ДОРЙЫСЬ И ДЕЛӦ ТОРКЫСЬ

Ас пемыдлун кузяным ми, коми крестьянаыд, зэв на омӧля тӧдам сӧвет власьтыдлысь законъястӧ; унджыкыс на немтор огӧ гӧгӧрвоӧ сэтысь; мыйкӧ кӧ миян лоӧ, кутшӧмкӧ судитчӧм могъяс, либӧ ковмас кӧ прӧстӧй шыӧдчӧм гижыштны, ми пыр жӧ кутам корсьны закон тӧдысь йӧзӧс — адвокатъясӧс, — и сэтшӧмъясыд вӧлӧсьтъясад миян эмӧсь, кутчысясны гижны, ошйысясны закон тӧдӧмӧн, водзвылысь деньгатӧ босьтасны, мукӧдыс гижӧдчысьыдлысь бура уна ылӧдлас да юас винаӧн да сурӧн, а кватитчан кӧ, ачыс сы мында жӧ тӧдӧ, мыйта гижӧдчысьыс. Сэтшӧм «аблакатыд» дорйӧм пыдди да делӧсӧ тӧлкмӧдӧм пыдди сӧмын дзугас да торкас — оз гиж, мый крестьяниныс тшӧктӧ, а кывъяссӧ быд ног дзигльӧдлас да, он и гӧгӧрво лыддьысьыс. Дерт, татшӧм омӧль гижӧмсьыд крестьяниныд тӧлксӧ немтор оз босьт.

Медым крестьянинтӧ сэтшӧм дзугсьыд мынтӧдны, ӧні обласьтувса суд лэдзис циркуляр (гижӧд); сы кузя, суд вывъясын дорйысьысьын вермасны лоны сӧмын дорйысьысь чукӧрысь (коллегия защитников) шленъяс либӧ кодӧс лэдзас коллегияыс. Дорйысьысь чукӧрсӧ (коллегия) лӧсьӧдасны быд народнӧй суд бердӧ, да ещӧ быд уездӧ вӧчасны юридическӧй консультацияяс, кытчӧ кутасны босьтны самӧй бур, тӧлкӧвӧй сӧвет власьтлысь законъяс тӧдысь йӧзӧс. Сэки крестьяниныдлы кӧ ковмас дорйысьысьыд суд вылад, сӧмын кор коллегия защитниковсьыд — пыр жӧ сетасны, гӧльыдлысь весиг донсӧ оз босьтны, мукӧдлысь донсӧ босьтасны торъя такса серти. Либӧ ковмас кӧ кутшӧмкӧ сӧвет закон серти справка босьтны, либӧ делӧ тӧлкмӧдны, либӧ шыӧдчӧм, либӧ норасьӧм гижны, мукӧдтор либӧ, — быдӧн сэтшӧмсӧ висьталасны-тӧлкмӧдасны дай гижасны сэні.

Татшӧм коллегияястӧ да консультацияястӧ вӧчнысӧ, дерт, медъёна йӧзыслы аслыныс старайтчыны жӧ колӧ, ас пӧвстсьыс сэтчӧ медбур-тӧлка йӧзсӧ ыстыны. Уджсӧ сэні мӧдас тӧлкмӧдны обсудбердса консультация.

Тадзи сӧмын позьӧ пемыд крестьяниныдлы юридическӧй отсӧг сетны да найӧс делӧ торкысь гуся адвокатъясысь мынтӧдны.

Калимов.