СИБЫРӦ ПЕРЕСЕЛИТЧӦМ ЙЫЛЫСЬ

Обласьтувса Видз‐му управленньӧӧ воалӧ юӧръяс аснаукӧн (самовольно) Сибырӧ мунысьяс йылысь. Мунігӧн пӧ найӧ вузавлӧны став овмӧснысӧ: керка-карта, скӧт да став донаджык кӧлуй; видз-муяс мунігӧн кӧртмалӧны, кутшӧмсюрӧ вӧлӧсьтъясын весиг исполкомын регистрируйтӧмӧн.

Та йылысь обласьтувса Видз-му управленньӧ висьталӧ:

Миян обласьтысь переселитчыны мукӧд губерняясӧ центрсянь разрешенньӧ абу. Позьӧ переселитчыны Сибырӧ да Волга бокъясӧ сӧмын сэтшӧм губерняясысь, кӧні ас губерня пытшкас дзескыд, йӧзыслы некытчӧ паськӧдчыны. Сы понда миян обласьтысь вузасьӧмӧн мунысь йӧз Сибырӧ либӧ мукӧд губерняясӧ лыддьыссьӧны аснаукӧн переселитчысьясӧн, налы некутшӧм кокньӧд либӧ отсӧг (льгота, пособйӧ), дажӧ некутшӧм бумага мӧд местаӧ мунӧм вылӧ оз сетсьы. Видз-му выль местаясысь налы сідзжӧ оз сетсьы.

Видз-му Комиссариат неважӧн на (юль 31 лунся 401-ӧд номера циркулярӧн) гижис: Сибырӧ пӧ сэки нин чукӧрмӧма вӧлі 40 сюрс морт аснаукӧн переселитчысьяс. Налы ставныслы лоӧма бергӧдчыны бӧр гортас либӧ кольччыны сэтчӧ нем уджтӧг да тшыг нисьӧ пӧт овны.

Сельсӧветъяслы да волисполкомъяслы колӧ:

1. Висьтавлыны та йылысь войтырлы скодъяс вылын да быдсяма пӧлӧс собранньӧяс вылын, ӧлӧдны мунысь йӧзӧс быд ногӧн вузасьӧмысь да аснаукӧн мунӧмысь мукӧд местаясӧ; исполкомъясын пӧ условйӧяс вузасьӧм йылысь оз кутны эскӧдавны (свидетельствуйтавны), сы понда татшӧм вузасьӧмъяс лыддьысьны пондасны вынтӧмӧн. Тадзи мунӧмӧн найӧ сӧмын рӧзӧритчасны да воштасны асьнысӧ бобыльӧ.

2. Некутшӧм эскӧданпасъяс (удостоверенньӧяс), код серти позьӧ думайтны вотчина сетіг выль местаысь, аснаукӧн мунысьяслы сетавны оз позь.

3. Условйӧяс — видз-му кӧртмалӧм либӧ прӧста кольӧм йылысь, керка-карта вузалӧм йылысь — регистрируйтны исполкомын сідзжӧ оз позь. Колясны кӧ видз-мусӧ ас костын лӧсьӧдчӧмӧн — исполкомъяслы пырысь-пыр жӧ колӧ босьтны обществоӧ (вӧлӧсьтувса видз-му комиссия пыр, 34-ӧд да 60-ӧд Видз-му Закон чукӧр статьяяс серти).

Эмӧсь юӧръяс, кӧнсюрӧ пӧ кӧртымӧн босьтӧм видз-муяс оз асьныс уджавны, сеталӧны кӧртымӧ водзӧ (субаренда). Сэтшӧмторъяскӧд исполкомъяслы да видз-му комиссияяслы колӧ вермасьны да бырӧдны вужнас. Обществоӧ сэтшӧм видз-муяссӧ босьтӧмысь ӧприч, кӧртымас мӧд пӧв сетысьсӧ да босьтысьсӧ колӧ сетны народнӧй судӧ да судитны 136-ӧд статья Уголовнӧй Закон чукӧр серти.

Обласьтувса Видз-му управленньӧ.