ВЫЛЬ НОГӦН ВЕЛӦДЧӦНЫ ПРАЗДНИЧАЙТНЫ

Во гӧгӧрнад волӧ зэв уна пӧлӧс праздник: Илля лун, шӧр спас, богородича, рӧштво, ыджыд лун, Ласей, Опонасей, вӧла Ёгорей,... лыддьыныс сорсян. Тайӧ праздникъясас йӧзыд лэччӧны вичкоӧ ен-батьлы кевмысьны да молебен сьылӧдны. Вичкоысь каясны да, самӧкур бутылка дорсьыд кутасны лакны либӧ настойка лагун ректыны. Юасны да петасны ывла вылӧ, стенысь стенӧ люкасьлӧны; паськӧм ставыс няйт, быттьӧ порсьяс, ныр ни вом оз тӧдчы. Сэсся косясясны бура ёна — кодлӧн киыс, кодлӧн кокыс, юрыс доймӧма.

Кутшӧм «бур» тайӧ вайӧ мужикыдлы? шайт кызь кымын зепсьыс быд праздник петӧ сур вылӧ да гӧсьтъясӧс вердӧм-юкталӧм вылӧ; во гӧгӧрнад нуӧ зепсьыд дзонь мӧс, а та местаӧ эськӧ позис машина ньӧбны либӧ плуг.

Ӧні видзӧдлам, кутшӧм бур вайӧ сӧветскӧй праздник. Со Айкатылаын коллим ӧні «нянь воан» (Урожай) праздник: вӧлі митинг, сэн кывлім уна буртор, кыдзи кӧзяйство кыпӧдны колӧ, кыдз таво ас кӧзяйствоын удж муніс. Аддзылісны крестьяна ас синнас, кутшӧм скӧт верман тӧждысьӧмӧн быдтыны, кутшӧм град выв пуктас быдтыны позьӧ, кутшӧм сю вермӧ воны миян муяс вылын да уна мукӧдтор. Аддзылісны электричествоӧн вартӧм. Крестьяна ӧні асьныс гӧгӧрвоасны, кутшӧм бур вайӧ сӧветскӧй праздник.

Шыбитамӧй праздничайтны попъяслысь лӧсьӧдӧм праздник, кутамӧй тадзи водзӧ праздничайтны, унджык пӧльза воас крестьяналы.