НАЛОГТӦ КӦ ЛИШНӦЙ МЫНТАН, ВОЛИСПОЛКОМАД БӦР СЕТАСНЫ

Миян обласьтын пӧшти быд вӧлӧсьтын нин крестьяналы сеталісны сельхозналог мынтӧм вылӧ окладнӧй листъяс. Ӧткымын йӧз ассьыныс налогнысӧ мынтісны нин.

Мукӧддырйиыс вермас лоны, окладнӧй листас мый вӧсна кӧ налогсӧ унджык (лишнӧй) пуктӧма: видз-мусӧ-ӧ, скӧтсӧ-ӧ пасйӧма лишнӧй, либӧ абу сетӧма закон серти колан кокньӧдсӧ, сідз водзӧ. Та кузя крестьянин норасьӧ гижӧдӧн вӧлӧсьтувса налогӧвӧй комиссияӧ.

Вермас лоны сідзи: налогӧвӧй комиссия эз на сяммы норасьӧмсӧ крестьянинлысь видлавны, крестьяниныслы колӧ нин мынтыны налогсӧ.

Уна крестьяна оз зільны мынтыны ассьыныс налогсӧ норасьӧмсӧ налогӧвӧй комиссияӧн видлавтӧдз. Найӧ полӧны, шуасьӧны: колӧкӧ пӧ налогӧвӧй комиссия мыйкӧ мында налогсӧ чинтас. Ми пӧ водзджыктӧ мынтам унджык налогтӧ да лишнӧйсӧ борсӧ оз нин сетны.

Збыль-ӧ тадзи? Колӧ-ӧ повны? Дерт, повны оз ков. Лишнӧй кӧ налогтӧ мынтан, бӧр сетасны. Сетавлісны бӧр быд во.

Таво босьтны лишнӧй мынтӧмтӧ ещӧ нин кокниджык. Колӧ крестьянинлы сӧмын сетны вӧлӧсьтувса налогӧвӧй комиссияӧ гижӧд налогсӧ лишнӧй мынтӧм йывсьыс. Комиссия видлалас гижӧдтӧ да лишнӧй мынтӧм налогсӧ крестьянинлы бӧр сетасны волисполкомас. Кольӧм вося моз, та кузя оз нин ков шыӧдчыны уездӧдз.

Неважӧн Сӧвет союзса Народнӧй Финанс Комиссариат ысталіс гижӧд кольӧм воын (1924−25 воын) крестьянаӧн лишнӧй налог мынтӧмсӧ бӧр сеталӧм йылысь. Тайӧ гижӧдас тшӧктӧма сетавнысӧ вӧлӧсьтувса налогӧвӧй комиссия пыр жӧ. Колян во кӧ кутшӧмкӧ крестьянин налогсӧ мынтыліс унджык, вермас та йылысь норасьны ас вӧлӧсьтувса налогӧвӧй комиссияас. Та вылӧ сроксӧ сетӧма 1926 воӧдз, апрель 1-ӧд лунӧдз. Комиссия шуӧм сертиыс крестьянинлы лишнӧй мынтылӧм налогсӧ волисполкомас бӧр сетасны.

Лишнӧй налог мынтӧм йывсьыс кӧ норасьӧмсӧ крестьянин удитліс нин ыстыны уездувса либӧ обласьтувса комиссияӧ, бӧр сетасны сьӧмсӧ волисполкомас жӧ. Уездувса да обласьтувса комиссияяслы тшӧктӧма видлавны татшӧм норасьӧмъяссӧ ноябр 1-ӧд лунӧдз.

Сідзкӧ крестьяналы повны нинӧм. Лишнӧй кӧ сійӧ мынтас налогсӧ, бӧр сетасны дай сетасны аслас волисполкомас жӧ, оз ков ветлыны уездӧдз ни обласьтӧдз.