МИЛИЦИЯ КОЛӦ

Айкатыла вӧлӧсьтын (Емдін уезд) тулыснас ни, гожӧмнас ни, ӧні ни эз вӧв дай абу милиция. Волас милиционер да, вежон кык-куим мысти вежасны. Миян вӧлӧсьтын йӧзыс вит сюрс саяс. Самӧкур пуӧм пондіс паськавны быд сиктын. Медся ёна пуӧны: Семуковын, Тыдорын, Шожымын, Ичӧт Айкатылаын. Бурджык самӧкур «фабрикантъясыс»: Шожымын — Шарик Вань, Ек Степ гӧтыр, Петя Вась гӧтыр да мукӧд; Семуковын — Исаков Ӧльӧш Наталь; Ичӧт Айкатылаын — Ӧльӧш Вань Микол. На вӧсна уна морт нин висьӧмӧ усины. Айкатыласа Сар Коль (профтехшколаысь кузнеч) да Яр Гриш (стӧрӧжыс сэтысь) омӧля и палявлӧны.

Колӧ неуна тупкавны самӧкур пабрикъяссӧ, а то дзикӧдз ойдам самӧкурнад. Колӧ не ӧти милиционерыс да вежон кежлӧ волывлӧм вылӧ, а колӧ кык милиционер да век кежлӧ.

Петшӧр.