ВИЗИН ВӦЛӦСЬТЫН (СЫКТЫВ УЕЗД)

Вӧлӧсьтса съезд вылын крестьяна ёна сёрнитісны видзьяс юкӧм йылысь. Колян ар видзьяссӧ юкисны, ас костаныс юксьӧмыс абу дзикӧдз артмӧма. Кӧсйӧны выль пӧв видзьяс юкны. Шуисны корны видз-му юклысьӧс (землемерӧс).

Кооперативлӧн удж ёнмӧ. Ӧні стрӧитӧ аслыс магазин да кӧлач пӧжаланін. Комсомолечьяслы да пионеръяслы судзӧдӧ газетъяс.

Инвалиднӧй кооперативлӧн уджыс мунӧ омӧльджыка. Приказчикыс абу судзсьӧм вель уна сьӧм, сійӧс вежисны. Тӧвар доныс оз чин.

Машинаӧн му уджалан тӧвариществояс эм вит сиктын. Нёль тӧвариществолӧн эмӧсь вартан машинаяс.

Сентябр 14-ӧд лунӧ вӧлі 2-ӧд районнӧй сельскокӧзяйственнӧй выставка. Сійӧ луннас вӧлі местнӧй праздник — Семен лун. Крестьяна волісны зэв унаӧн. Мужикъяс ёна видлалісны вартан машина. Торъя выль ногӧн уджалан му вылын (опытно-показательное поле) вӧлі толькӧ сю да ид, быдмӧма крестьяналӧн кодь жӧ.

Тайӧ му уджалӧмсӧ сувтӧдӧма омӧля, гӧрны да пинёвтны медалӧны мужикӧс; уджалӧны коми, ас вӧчӧм, гӧрйӧн.

Турнепс пуктылӧмаӧсь да, воӧма кулак гырся сӧмын. Агроном видлавлӧ омӧля. Крестьяна шуӧны, татшӧм опытно-показательнӧй муыд кӧть пӧ эз и вӧвлы.

Гожӧмнас Визин вӧлӧсьт кузьта вӧчисны туй. Галькисӧ вайлісны вель уна да, топӧдісны вӧчигас омӧля, эз вӧв катокыс. Ӧні унджык вӧчӧмсӧ выль пӧв галькиалӧны. Тулыснас кӧ каток вӧчисны, этшаджык эськӧ сувтіс туй вӧчӧмыд.

Н. К.