НЁБДІНСА СӦВЕТ БӦРЙИСНЫ

Нёбдін вӧлӧсьтын (Кулӧмдін уезд) Сӧветӧ бӧрйысьӧм да вӧлӧсьтувса съезд помасис сентябр 17-ӧд лунын. Сӧветас бӧрйысьӧм уджсӧ нуӧдны воліс обласьтувса карысь Забоев ёрт. Бӧрйысьӧмыс муналіс став сиктъясас. Бӧрйысян собранньӧ вылас волісны 35% (сё морт пытшкысь 35 морт). Колян во вӧлі сӧмын 12% йӧзыс.

Вӧлӧсьтувса Сӧветӧ бӧрйисны кызь мортӧс. На пиысь 35% коммунистъяс да комсомолечьяс. Таво бӧрйысигӧн коммунист партиялӧн ячейкаыс некутшӧм список бӧрйыныс эз мыччыв, бӧрйисны сідзи, списоктӧг. Сӧветӧ сюри куим нывбаба (колян во вӧлі сӧмын ӧтик).

Вӧлӧсьтувса съезд муніс кык лун чӧж, 9 час асывсянь да квайт час рытӧдз (колян во муніс ставыс час куим кымын).

Съезд вылын ёна сёрнитісны уездувса исполком доклад кузя. Сёрнитӧм бӧрын шуисны: содтыны дон уджалӧмысь крестьяналы; чинтыны исполкомса служащӧйяслысь жалӧванньӧсӧ (спецъяс кындзи). Сэсся съезд вылын шуисны бырӧдны фининспекторъясӧс: ӧнӧдз пӧ фининспекторъяс вӧлӧсьтын некутшӧм общественнӧй удж эз нуӧдлыны; сӧмын пӧ найӧ воласны вӧлӧсьтад, видзӧдласны да бӧр мунасны, дай сійӧ пӧ, коран кӧ, дон вылӧ воласны. На пыдди съезд шуис лӧсьӧдны вӧлӧсьтувса исполкомын финансӧвӧй пызан (стол). Финанс юкӧдлӧн пӧ аппаратыс зэв ньӧжмыд, колӧ пӧ кыдзкӧ сувтӧдны бурджыка.

Мельниклысь доклад кывзӧм бӧрын съезд шуис: мельничаын изігӧн лӧсьӧдны ӧчередь, изӧмысь дон босьтны 4 урӧн пудйысь. Ӧнӧдз изігӧн некутшӧм ӧчередь эз вӧвлы да изӧмсьыс вӧлі босьтӧны 6 урӧн пудйысь. Мельникыс вӧлі сар кодь: уджӧдӧ вӧлі ёна йӧзӧс прӧста, водз изӧм вылӧ, а изӧмсьыс вӧлі босьтӧ торъя дон.

Вӧлӧсьтувса исполкомӧ веськалісны беспартийнӧй йӧз. Найӧ вӧвлӧмаӧсь Гӧрд армияын, ставыс зэв бур войтыр. Надейтчам — выль бӧрйӧм йӧз кутасны уджавны бура.

Шыпач.