МАСТЕРЪЯС, ӦТУВТЧӦЙ

Сыктывдінкар бердын Выльгортын эм уна мастерӧвӧй йӧз. Сэні вӧчӧны быдсяма пуа кӧлуй, кӧрта кӧлуй, сёя кӧлуй. Уджалӧны зэв бура, ӧкуратнӧя. Эмӧсь бур кузнечьяс, бур слесаръяс, бур столяръяс.

Сыктывдінкарын базаръяс лунӧ кытчӧ он видзӧдлы, сэні и выльгортса тӧвар: сэні пызан, улӧс, шкап, диван да мукӧдтор, сэні кӧрта кӧлуй. Уна пиад быдсяма пӧлӧсыс овлӧ: коді вӧчӧ бура, крепыда, коді омӧля.

Ньӧбасьысьяс тӧварсӧ оз ошкыны.

Уна пӧлӧс сёрни мунӧ выльгортса тӧвар йылысь: со пӧ меным сюри виялан пельса, со пӧ менам улӧсӧй киссис да и краскаыс вушйис, и сідз водзӧ.

Мастеръяслы колӧ бур тӧвар вӧчны.

Сэтшӧм сёрнияс вӧснаыс выльгортса тӧварыс вылӧ доныс пыр усьӧ. Коді кӧсйӧ бур тӧвар ньӧбны, базар вылад оз и видзӧдлы. Лёк тӧварӧ пӧ веськалан да, тӧлысь-мӧд мысти бара сійӧ жӧ ньӧб.

Артеляд кӧть и бур тӧваръяс эмӧсь, да ӧткымын омӧль кузя и бурсӧ тшӧтш омӧльтӧны. Сы понда колӧ мастеръяслы нуӧдны сёрни: кыдзи кыпӧдны тӧварлысь бурлунсӧ.

Ӧтувтчӧмын вын.

Ӧтка вӧчасьысьлы ньӧбысьыд некор оз верит, ошкы кӧть эн тӧвартӧ. Зэв нин серӧктігмоз шуас: вузалысьлӧн пӧ лёк тӧвар оз овлы.

Мастеръяслы колӧ ӧтувтчыны либӧ асланыс, либӧ кооперативъяс бердӧ восьтыны кустарнӧй отделенньӧ да сы пыр вузавны ассьыныс вӧчалӧм тӧваръяссӧ. Сідзи вермас кыптыны тӧварлӧн бурлуныс. Сідзи вермас аддзыны выльгортса тӧвар ассьыс места базар вылын. Сӧмын сідзи вермас кыптыны авторитет выльгортса мастеръяслӧн.

Тӧварыд кӧ мунӧ кооператив пыр либӧ кутшӧмкӧ мукӧд пӧлӧс ӧтувтчӧм правленньӧ пыр — ньӧбысьыд сы вылӧ, дерт нин, веритас: правленньӧыд пӧ омӧль тӧвартӧ базар вылад оз петкӧд.

Выльгортса мастеръяс, ӧтувтчӧй кооператив бердӧ, восьтӧй сэтчӧ кустарнӧй отделенньӧ да уджыштӧй асланыд контроль пыр тӧвар бурмӧдӧм вылӧ.

Пырӧй сэтчӧ ставныд шленӧ да восьтӧй Сыктывдінкарӧ вузасянін, мед эз нин ков аслыныд быд улӧс кыскыны базар вылӧ да сы дінын лунтыр сулавны!

Примитӧй сӧмын сэтшӧм шленӧс, коді зільӧ уджавныс, мед отделенньӧ вылад йӧзыс кутасны бура видзӧдны; сэсся лӧсьӧдӧй быд шленлы номеръяс, мед вузалысьыс и ньӧбысьыс вермас тӧдны, коді кутшӧм кӧлуй вӧчӧма.

Правленньӧ вермас пуктыны усьтӧм дон (цена) сӧмын бур тӧвар вылӧ, кор лоӧ гарантия ӧта-мӧдсянь (шленъяссянь правленньӧкӧд). Правленньӧ пыр позьӧ судзӧдны бур уджалан кӧлуй (орудия производства), кутшӧм кӧлуйӧн позьӧ этшаджык удж пуктӧмӧн унджык тӧвар вӧчны базар вылӧ. Правленньӧ жӧ шленъяскӧд вермас вӧчны ӧтувъя мастерскӧй, лӧсьӧдны водзвыв бур кос вӧр сэтшӧм пӧраын, кор позьӧ ньӧбны донтӧгджык, а кузнечьяслы — ньӧбны ӧтпырйӧн (оптом) унджык кӧрт, кодӧс донтӧгджык сетӧны.

Уна буртор позьӧ вӧчны ӧтувтчӧм бӧрын (ставсӧ, дерт, он вермы гижны).

Выльгортса кооперативлы колӧ отсавны вӧчасьысьяслы уджсӧ лӧсьӧдны да висьтавлыны собранньӧяс вылын ӧтувтчӧм йывсьыс.

Колӧ ӧнісянь жӧ заводитчыны тайӧ удж бердӧ, мед эз вош прӧста бур пӧраыс.

Уджыштӧй, ёртъяс!

Мишин.