КЫДЗИ ТӦЛЫН ВИДЗНЫ ПУКТАС

Миян коми крестьяна, ёнджыка нывбабаяс, полӧны пуктас сісьмӧмысь да кынмӧмысь. Пуктас кынмӧмысь да сісьмӧмысь позьӧ видзчысьны со кыдзи.

Картупель миян коми крестьянка гуалӧны гуясӧ. Галанка зэв нин этша гуавлӧны да сӧмын шочиникыс, а капуста солалӧны.

Пуктасъяс идралӧны тӧв кежлӧ кӧбрӧгӧ, гӧбӧчӧ да гуӧ, косінӧ, кытӧн абу ва. Гуын ли, кӧн ли кӧ эм ва, колӧ джоджавны либӧ вӧчны джадж да пуктавны сэтчӧ. Сынӧд (воздух) колӧ лоны гуын ли, кутшӧмкӧ мупытшса вежӧсын ли, сӧстӧм да свежӧй. Йӧрмӧм дука сынӧд сэні рӧдмӧдӧ посньыдик, синмӧн аддзытӧм, дука гагъясӧс (бактерия), найӧ сэсся и сісьтӧны пуктасъяссӧ.

Таысь колӧ видзчысьны — гуяс, пӧдвалъяс пыр колӧ пуктас сюйтӧдз тӧлӧдны, косьтыны восьтылӧмӧн. Тӧлӧдны колӧ арын, мича‐шондіа лунъясӧ.

Гуысь кӧ бырӧдны лёк сынӧдсӧ, лёк дуксӧ да посньыдик синмӧн аддзытӧм гагъясӧс, колӧ тшынӧдны сераӧн пуктас пуктытӧдз-сюйтӧдз: пуктӧны гу пытшкас биа ӧгыр, ӧгыр вылӧ киськалӧны сера, медым сотчас да лӧз тшын лолас. Сы бӧрын ӧдзӧс либӧ вевтсӧ пӧдлалӧны топыда да видзӧны сідзи лун куим-ӧ-нёль.

Галанка да мукӧд пуктас колӧ гуавны косӧн, мед эз вӧв корйыс ньӧти, сэки оз сісьмы, оз тшык некутшӧм пуктас.

Агрономъяс! Тіян мог ещӧ гижны бурджыка пуктас видзӧм йылысь. Мед крестьяналӧн пуктас оз тшык, туйдӧдӧй да сетӧй налы бур индӧд!

Эп—пӧ.