КУЙӦДЫД ЭТША — КОЛӦ СОДТӦД УДОБРЕННЬӦ

Миян муяс куйӧдавтӧг няньтӧ оз вайны. Кӧні видзьяс эмӧсьджык, сэн, дерт, уна скӧт видзӧны да, бурджыка куйӧдалӧны муястӧ. Сэн и няньыд воӧджык. Кӧні видзьяс абу зэв уна, сэн скӧт омӧля видзӧны — муяс вылӧ этша куйӧд вичмылӧ. Тырмымӧн куйӧдалӧм миян обласьтын некӧн абу. Колӧ кыдзкӧ скӧт куйӧд бердӧ корсьны содтӧд.

Миян кӧзяйствоясын мукӧддырйи прӧста вошӧ сэтшӧм удобренньӧыс, скӧт куйӧдлы содтӧдыс. Босьтам кӧть пач пӧим. Миян быд керкаысь нин во гӧгӧрнад чукӧрмас 15−20 пудйыд, а кытчӧ воштӧны сійӧ пӧимсӧ? Корсюрӧ босьтлӧны кунва пуны; ставсӧ сэсся сідзи туй бокъясӧ да кытчӧ кисьталӧны. А пӧимыд, вӧлӧмакӧ, зэв бур удобренньӧ. Пӧимас эм зэв уна калий (быдмӧгъяс босьтӧны мусьыс сэтшӧм сёянтор аслыныс). Кор пӧимтӧ пуктан муад, сэк быдмӧгъясыдлы сёянторйыс лоӧ унджык да бурджык — быдмӧгъяс бурджыка быдмасны, лоӧ бурджык урожай. Ми тайӧ таво гожӧм тӧдмалім лук град вылын. Град местаыс миян лыа кодь инын. Пуктім кык орчча град вылӧ лук; ӧти град вылас киськалім пӧим (быд квадрата сажень вылӧ ведра кык кымын), мӧд град вылас эгӧй. Коркӧ и быдмисны лук позъяс: пӧима град вылын зэв гырысь лук, кузь лук туруна; пӧимтӧм град вылын — шӧркоддьӧм, кутшӧм миян унджыкыс овлывлӧ. Тайӧ видлалӧм бӧрад ме зэв ӧні тӧда пӧимлысь бурлунсӧ, некор ог понды прӧста шыблавны. Тіянлы, коми аньяслы, сідзжӧ колӧ чӧжны пӧимтӧ да му вылад да град вылад шыблавны.

Унатор на эськӧ миян гӧгӧр, гашкӧ, эм сэтшӧм бурторйыд да, огӧ ӧд тӧдӧй. Мед эськӧ миян коми агрономъяс газет пыр висьтавласны та йылысь.

З.-Ань.