ВЦСПС-лӧн ДЕЛЕГАЦИЯ ЯПОНИЯЫН

Рабочӧйяслы нимкодь. Правительство скӧралӧ.

Токио. СССР-са профсоюзъяс Сӧветлӧн делегацияыс воис Токиоӧ (столича Япониялӧн). Быд сувтланінын профсоюзъяс Сӧветса делегацияӧс встречайтісны японияса рабочӧй да крестьяна союзъяссянь делегацияяс. Быд вокзал, кытчӧ сувтлісны СССР-са профсоюзъяслӧн делегацияыс, вӧлі дзик тыр йӧзӧн. Быдлаын найӧ горзісны «банзай (ура)», СССР-ӧс да СССР-са рабочӧйясӧс ошкӧм кузя да став мувывса рабочӧйясӧн ӧтувтчӧм кузя. ОСАКА карын вокзал вылас эз тӧрны делегациялы паныд петысь рабочӧйясыс. Кобе карын рабочӧйясыс поезд вӧрзьӧм бӧрас нин мый вермисны вӧтчисны поезд бӧрсяньыс СССР-ӧс ошкӧм кузя «банзай» горзігтырйи. Японияса государство пытшкӧс удж нуӧдысь (внутренних дел) министр тшӧктӧм серти арестуйталӧмаӧсь став ёнджыка рабочӧйяс дор мунысь японияса профсоюзъясысь нырщикъяссӧ да миян делегациялысь сёрни вуджӧдысьсӧ (сійӧ СССР-са Телеграфнӧй Агентстволӧн корреспондент Токио карас). Токиоын пӧличаыс эз кӧсйы лэдзны рабочӧйясӧс паныд петны СССР-са делегациялы. Японияса горнорабочӧй профсоюзъяслӧн нырщикыс Като заводитліс висьтавны чолӧмбыттьӧ СССР-са профсоюзъяс делегациялы, сӧмын сійӧс пырысь-пыр пӧличаыс арестуйтіс. Сыкӧд тшӧтш арестуйтісны японияса профсоюзъяс сӧветлысь делегациясӧ, коді локтіс Симоносекисянь СССР-са делегациякӧд. Симоносеки карсянь Токиоӧдз СССР-са профсоюзъяс Сӧветлысь делегациясӧ колльӧдіс японияса профсоюзъяс Сӧветлӧн делегацияыс. Симоносекиӧдзыс найӧ паныд волӧмаӧсь Токиосяньыс.

Кось рабочӧйяслӧн пӧличакӧд.

Арестуйталӧм бӧрад лыбис зэв ыджыд кось рабочӧйяс да пӧлича кост. Сӧмын кык час мысти пӧлича вермис вӧтлыны рабочӧйясӧс вокзал вывсьыс да матігӧгӧр уличаясысь. Японияса пӧлича быд ног зільӧ, мед СССР-са профсоюзъяс сӧветлысь делегациясӧ торйӧдны Японияса профсоюзъясысь.