КОЛӦ МЫНТЫНЫ ВОДЗӦСА КӦЙДЫС

Матысмӧ кӧйдыс водзӧс мынтан кад.

Таво вӧлі бур во. Унджык крестьяналӧн нянь воис бура. Позьӧ шуны: кӧйдыс водзӧс таво дзоньнас нин мынтасны. Но колян вося моз, гашкӧ, лоӧны на кодсюрӧ сэтшӧмӧсь: пондасны нюжӧдчыны мынтӧмсьыс, пондасны надейтчыны, гашкӧ пӧ, бара на таво лоӧ кутшӧмкӧ кокньӧд, гашкӧ пӧ либӧ, дзикӧдз уджйӧзтӧ прӧститасны.

Тадз видзӧдны оз ков. Мыйӧн кодлӧн вартсяс — пырысь-пыр жӧ колӧ мынтыны водзӧс да бурджык кӧйдысӧн. Мӧдысь кӧ ковмас водзӧсасьны, мед эськӧ бара позяс босьтны бур кӧйдыс.

Мӧйму лёк во понда лои нюжӧдлыны кӧйдыс водзӧс мынтӧм тулысладорӧдз, ӧткымыныслысь мӧд воӧдз.

Мӧймуся моз кӧ удждысьысь крестьяна таво кутасны вӧчны да оз мынтыны водзӧс, мӧд во сэсся сетавныс нинӧм оз ло. Сеталӧм ӧд абу помтӧм. Ӧні крестьяна ордын Коми обласьт пасьта ветлӧ удждӧм кӧйдыс 70 сюрс пуд гӧгӧр. Быд во кӧ вузасьысь чукӧръяс (Обсоюз, Хлебопродукт да Госторг) кутасны тадзи кӧйдыс вылӧ видзны ассьыныс сьӧмсӧ — регыд гӧльмасны да сэсся сетавныс нинӧм оз ло. Удждысьӧмыд сӧмын овлӧ бур, водзӧссӧ кӧ мынтӧны кад кежлӧ да бура.

Надейтчыны таво кӧйдыс уджйӧз мынтӧм нюжӧдӧм вылӧ либӧ дзикӧдз прӧститӧм вылӧ оз ков. Нюжӧдны ни, прӧститны ни водзӧ кежлӧ сэсся оз позь. Бур вылӧ колӧ бура жӧ видзӧдлыны. Оз ков виччысьны ёна корӧм. Быдӧн тӧдӧны: водзӧсалӧмтор колӧ мынтыны.

Ӧні, дерт, важ моз зэв лёкысь оз кутны перйыны уджйӧзтӧ, крестьяниныд кӧ мынтыныс оз вермы. Но кор крестьянин вермӧ уджйӧз мынтыны да лёкла оз мынты — сэки сійӧс юрӧдыс оз малавны. Сэк, дерт, уджйӧзтӧ перъясны. Сэтшӧм лёкӧдз, судӧдз да радӧдз делӧ нуӧдны оз ков.

Ӧні кӧйдыс мынтыны позьӧ нин. Кор эм унджык нянь, кор водзӧссӧ мынтыны кокньыдджык — сэк жӧ колӧ кӧйдыс уджйӧзтӧ мынтыныд.

А. Потапова.