МЕЖАДОРЫН
(Сыктыв уезд)
Нывбаба — волисполкомын секретар.
Межадорын муніс вӧлӧсьтувса съезд бура. Сӧветъясӧ бӧрйысигӧн волісны 41% став йӧзсьыс. Бӧрйысигӧн йӧзыс зэв бура да збыльысь асьнысӧ кутісны. Волисполкомӧ бӧрйисны Раевскӧй Кузьмаӧс (важ председательыс), Морозов И. А. (видз-му удж нуӧдысьӧ). Секретарас бӧрйисны нывбабаӧс Н. И. Морозоваӧс. Удж нуӧдӧм йылысь водзӧ кежлӧ огӧ на тӧдӧ. Важ волисполкомыс тай уджаліс бура-а.
Кооператив
уджалӧ шӧркоддьӧма. Неважӧн вежисны приказчиксӧ. Важ приказчикыс зэв уна абу тырмӧма, ӧні обществоыс корӧ сылысь мынтыны. Ог тӧд, вермас оз-а, кӧсйысьӧ тай-а. Тӧвар лавкаын эм бура уна. Вузасьӧ быд лун выльлунысь ӧтар.
Удждысян (кредитнӧй) тӧварищество уджалӧ бура, сӧмын ӧні уджыс сувтӧма: деньгаыс бырӧма да. Зэв нин унаысь волсясаяс волісны деньга босьтны да, тыртӧг бӧр лои мунны. Обласьтувса банкас пӧ ревизия мунӧ да, оз пӧ ӧні ысты сьӧмсӧ.
Мӧда-мӧдлы отсасян комитетын шленыс эськӧ этша да, ӧні пыр на уджаліс буракодь. Стрӧитіс зэв бур мельнича, изӧ зэв ӧдйӧ — пӧшти 200 пуд саяс.
Комсомол ячейкаын уджыс бура важӧн нин сулалӧ. Секретарыс тай чукӧртлас собранньӧ да, оз и прамӧя чукӧрмывлыны. Сэсся шленъяс юӧны, избачлысь да секретарлысь ӧлӧдӧм оз кывзыны. Колӧ комсомолечьяслы ас костас заводитлыны бура уджавны.
Лыддьысян керка уджалӧ слаба жӧ. Уджсӧ нуӧдныс эськӧ гашкӧ избачыд и вермас да, керкаыс зэв омӧль. Сэсся стӧрӧжыс зэв лёк: йӧзтӧ унасӧ пырныс оз лэдз, а том йӧз пыралӧны рытын тырысӧн. Воӧны газетъяс: «Югыд Туй», «Коми Сикт», «Беднота», «Крестьянскӧй газет», журналъяс: «Новая Деревня», «Крестьянка» да «Вожатый».
Ме думысь кӧ эськӧ, лыддьысян керкатӧ колӧ жӧ тась мӧдлаӧ нуны да, сӧмын вот этша сметаас лыддьӧмаӧсь — 5 шайт стӧрӧжӧн и пескӧн. Дерт, тайӧ дон вылад бур керкаад некод оз лэдз.
Пионер отряд пӧшти кусӧма. Вожатӧйыс эськӧ курсант да, уджсӧ немтор жӧ оз нуӧд. Ячейкалы колӧ вожатӧйсӧ бурджыка туйдӧдны, медым уджалас.
Пельшӧр — зэв пӧрысь нывбаба, омӧля и вермӧ ветлыныс нин. Сӧмын нин модаыс эськӧ да, мыйкӧ тай век оз вежны-а. Кутшӧмкӧ кӧ эськӧ ён висьӧм локтас татшӧм пельшӧрнад, уна жӧ йӧз шырзяс да.
Гусь.
