СЕЛЬСКОКӦЗЯЙСТВЕННӦЙ ВЫСТАВКА

Сентябр 6-ӧд лунын Кулӧмдінын вӧлі сельскокӧзяйственнӧй выставка. Выставка вылас Уллянаса совхозсянь вайлісны вӧвъяс, мӧсъяс, куканьяс да бур рӧда порсьяс. Сы кындзи выставка вылӧ скӧт вӧлі вайӧмаӧсь и крестьяна. Видз-му юкӧд выставка вылӧ петкӧдліс уна пӧлӧс гӧръяс, пиняяс да видз-му уджалан машинаяс: вартан, кӧдзан, ытшкан, кӧйдыс весалан, куртан да мукӧд пӧлӧс. Сэсся выставка вылын уна вӧлі град выв пуктас да му вылын быдманторъяс. Выставка вылӧ йӧзыс воліс зэв уна; волісны унаӧн боки сиктъясысь. Сэк кежлӧ жӧ веськалісны сэтчӧ призывникъяс. Крестьяна выставкасӧ ёна ошкисны да зэв бура кывзісны агрономлысь висьтавлӧмсӧ. Видз-му юкӧдлӧн выставка вылас эськӧ сьӧмыс зэв этша вӧлі, да вӧчис зэв ыджыдтор. Выставка вылын весиг пӧрысь йӧз кутісны шуны, колӧ пӧ вӧлӧм агрономъясыдлысь кывзыны.

Татшӧм выставкаястӧ колӧ вӧчавны быд вӧлӧсьтын. Рӧскодысь дзик нинӧм повны.

Л. Дедов.