НЯНЬ ЛӦСЬӦДӦМ УКРАИНАЫН МУНӦ БУРА

Озджык тырмы пабрик-заводса тӧвар. Сы вылӧ некыдз дон не лэптыны шуисны.

Ставукраинаса Центральнӧй Исполнительнӧй Комитетын вӧлі доклад нянь лӧсьӧдӧм (заготовки) удж мунӧм йылысь. Доклад вӧчысьыс висьталіс: нянь лӧсьӧдӧм пӧ мунӧ лӧсьыда. Сӧмын пӧ ичӧтика торксьыштӧ тайӧ уджыс промышленнӧй тӧвар тырмытӧмла. Сы вӧсна пӧ крестьяна озджык петкӧдны вузавны няньсӧ. Петровскӧй ёрт (ЦИК-ас председательыс) шуис: Украинаса пытшкын вузасьӧм лӧсьӧдан Комиссариатлы пӧ колӧ быд ногӧн зільны вайны сиктъясӧ промышленнӧй тӧвар. Колӧ пӧ крестьяналы тшӧтш быд ногӧн отсавны нянь лӧсьӧдӧм уджыслы. Колӧ висьтавны крестьяналы, кутасны кӧ найӧ видзны няньнысӧ ас кианыс, омӧльджык лоӧ промышленносьтнымӧс дай видз-му уджалӧм. Доклад серти шуисны вузасьӧм лӧсьӧдан Комиссариатлы быд ногӧн зільны лӧсьӧдны бур дон нянь вылӧ, видзны пабрик-заводса тӧвар донсялӧмысь.