«УРОЖАЙ ПРАЗДНИК»

Кык лун мысти Сыктывдінкарын воссяс сельскокӧзяйственнӧй выставка. Тайӧ луныс (субӧта, сентябр 26-ӧд лун) — каргӧгӧрса (район) видз-му уджалысь йӧзлӧн праздник. Тайӧ луныс — кык вевся праздник: ӧти-кӧ, выставка воссьӧ, мӧд-кӧ — тайӧ лунас тані мунас «Урожай» праздник.

Выставкаыд — зэв бур школа крестьяналы. Сэні найӧ тӧдмасясны: кыдзи выль ногӧн кутчысьны уджӧ, кыдзи кыпӧдны позьӧ бурджыка кӧзяйство, унатор. Выставка вылын петкӧдласны крестьяналы быдтор: кыдзи босьтны бурджык нянь урожай, кыдзи лӧсьӧдны бурджык кӧйдыс, кыдзи шабді бурджыка да мичаджыка воӧ — ставсӧ сійӧ крестьяна аддзыласны асланыс синмӧн, висьталасны, кыдзи бурторйыс артмӧ да кыдзи омӧльыс лоӧ видз-му уджалігӧн. Петкӧдласны и вӧвлытӧмтор на миянын — трактор. Унатор тӧдасны крестьяна, ёна водзмӧстчасны выльлань уджнаныс мунны.

Тайӧ выставкаыскӧд таво ӧтлаасьӧ тшӧтш тані «Урожай» праздник. «Урожай» праздник миян СССР пасьтала быд воӧ мунӧ. Войдӧр вӧлі нянь идралӧм бӧрын молебенъяс сьылӧдалӧны, аттьӧ кайтӧны абутӧм енлы. Ӧні унджык крестьянаыс нин казялісны: енмыд оз отсав, ачыд кӧ он уджав да он тӧждысь.

Таво «Урожай» праздниксӧ колӧ колльӧдны бурджыка воддза вояс дорысь. Тавося кодь урожайыс миян СССР пасьтала эз нин вӧвлы зэв важӧн — 1913ʼ восянь.

Тайӧ праздникнас сӧвет власьт да коммунист партия петкӧдлӧны, кутшӧма вермӧны уджавны крестьяна асьныс, помещикъястӧг, озыръястӧг; кутшӧма бурмис (достижение) миян кӧзяйство тайӧ во-мӧднас мирнӧя олігӧн. Урожайыс миян Сӧветса Республикаяс Союзлысь ёнмӧдӧ вынсӧ, кыпӧдӧ оласногсӧ мукӧд государствояс водзын.

Сы понда быдлаын колӧ «Урожай» праздниксӧ бура нуӧдны, медым сійӧ збыльысь вӧлі крестьяналӧн ыджыд праздник.

Став организацияяслы колӧ ӧтвылысь тайӧ праздниксӧ колльӧдны, ӧтвылысь крестьянакӧд.