ЧЕЛЯДЬӦС ЯСЛИЫН ВИДЗӦМЫСЬ — ЫДЖЫД АТТЬӦ!

Пожӧг вӧлӧсьтын (Кулӧмдін уезд) Вомынбӧж сиктын таво гожӧм вӧлі восьтӧма кага видзан ясли. Сэні видзисны кагаяс медгӧль крестьяналысь. Ичӧт кагаяслы овны вӧлі зэв лӧсьыд, лӧсьыд вӧлі мамъяслы — оз ков вӧлі повны кага вӧсна видз-му вылын уджалігӧн. Тайӧ крестьяналы ёна кажитчис, найӧ ыстӧны ыджыд аттьӧ сӧвет власьтлы. Огӧ ми вунӧдӧй казьтыштны яслиын уджалысьӧс А. А. Шаковаӧс (школаын велӧдысь). Ӧти пӧраӧ дзикӧдз орлім деньгаысь, думайтам вӧлі, пом воис яслилы: кватитчим кӧ, Шакова ӧктысян листӧн чукӧртӧма сьӧм. Бара ловзим. Но сійӧ деньгаыд вывті на этша вӧлӧма, весиг кага видзысьяс вылӧ эз тырмы; сэки Шакова сетіс ассьыс нывсӧ яслиӧ кага видзны (Шакова семьяа морт), мед нин толькӧ страда шӧрын оз тупкысь яслиыд. Уна бур вӧчис Шакова, ыджыд аттьӧ сылы ми ыстам.

Яслиын олысь кагаяслӧн мамъяс.