КЫРНЫШЪЯС КУРКСӦНЫ

Пыр на чайтӧны СССР-ӧс путкыльтны

Корсьӧны сьӧм государствотӧм сарлы. Гӧрд армия кӧ пӧ сувтас тіян дор, сетам сьӧмтӧ.

Революция лоӧм бӧрти Сӧвет Россияысь пышйылӧм озыр йӧз ӧні олӧны Францияын, Англияын да, кӧні да. Найӧ пыр на надейтчӧны СССР-ӧс путкыльтны, локны Россияӧ да ас кианыс власьтсӧ босьтны, пуксьӧдны сарӧс. Сы кузя налӧн пыр мунӧ ас костаныс сёрни. Ӧні Парижын тайӧ лунъясӧ вӧлі монархистъяс (сар дор сулалысьяс) военнӧй штаблӧн заседанньӧ. Председателяліс сэні Николай Николаевич (сар дырйи вӧлі князьын дай ӧти кадын германскӧй война дырйи главнокомандующӧй русскӧй армия вылын. Сійӧс витӧны сарӧн Россияӧ). Заседанньӧ вылас вӧлі доклад францияса монархистъяскӧд сёрни нуӧдӧм йылысь. Францияса монархистъяс пӧ кӧсйӧны отсавны сьӧмӧн Николай Николаевичӧс сарӧ пуксьӧдны зільысь йӧзлы, лоӧ кӧ пӧ Гӧрд армияын восстанньӧ Николай Николаевич дор (зільӧй, зільӧй! Гӧрд армия сэтшӧм «восстанньӧ» петкӧдлас тіянлы! Ред.). Сэні жӧ висьталісны германияса монархистъяскӧд сёрни нуӧдӧм йылысь. Найӧ пӧ сьӧмӧн миянлы эз кӧсйыны отсавны, ми кӧ пӧ босьтам сьӧмсӧ францияса монархистъяслысь. Заседанньӧ вылас эз воны ӧти кывйӧ, шӧрӧ-выйӧ вошины: оз тӧдны, кодарыслысь бурджык босьтны сьӧмсӧ.