СИКТЪЯСӦ ТӦВАР ВАЙӦМ ЙЫЛЫСЬ

Таво сельхозналог абу ыджыд. Сійӧс мынтӧм вылӧ лӧсьӧдӧма вель гырысь срокъяс. Сідзкӧ налог мынтӧм вӧсна таво крестьянин ассьыс няньсӧ вузавны кольӧм во мында оз петкӧд.

Та вӧсна сиктъясӧ тӧвар вайӧм лои зэв ыджыд удж. Колӧ лӧсьӧдны сідзи, медым крестьянин ассьыс няньсӧ вузалас да вермас ньӧбны сы вылӧ колан тӧвар, промышленнӧй тӧвар.

Тайӧ арын тӧвар оз тырмы — мыйта колӧ, сы мындаыс абу. Колӧ вӧчны, медым эськӧ веськыда да бура юкны мый эм миян тӧварыс карлы да сиктъяслы.

Медым эськӧ тӧварыс миян тырмасджык, уджсӧ лоӧ нуӧдны куим боксянь.

Ӧти-кӧ, ми ӧні быд ногыс зілям паськӧдны ассьыным промышленносьтнымӧс.

Сэсся, мӧд-кӧ, ӧні заграничаысь тӧвар унджык ваям. Таво медъёна лоӧ ньӧбӧма да вайӧма крестьяналы колан тӧвар: новлан кӧлуй да видз-му уджалан машинаяс. Тайӧ тӧварыс воас тайӧ арын.

Сӧмын заграничаысь вайӧм тӧварыс оз на жӧ тырмы. Колӧ ещӧ тӧварсӧ корсьны мукӧд ногӧн. Та вӧсна ӧні лоӧ сетны быдсяма отсӧг посни кустаръяс промышленносьтлы. Кустаръяслы колӧ сетны тӧварнысӧ вӧчны колан кӧлуй (сырье), колӧ удждыны налы сьӧм кустаръяс кооперация пыр.

Тадзиӧн удж нуӧдӧмӧн ми вермам унджык промышленнӧй тӧвар сетны сиктъясӧ.