КООПЕРАТИВЪЯС, НУӦДӦЙ ЮГДӦДЧАН УДЖ!

Кооперацияын ӧткымын уджалысьяс шуасны: кооперациялы пӧ йӧзӧс югдӧдан удж нуӧдӧм абу на зэв колантор, позьӧ пӧ сытӧг овны. Ӧткымын татчӧ ещӧ содтасны: миян пӧ уджным — сӧмын вузась. Югдӧдасны йӧзӧс мед йӧзӧс велӧдан отделъяс.

Татшӧм уджалысьясыс вунӧдӧны югдӧдан уджлысь коланлунсӧ, вунӧдӧны — югдӧдан удж нуӧдӧмӧн кооперативъяслӧн сэтшӧм жӧ ыджыд мог, кутшӧм вузасьӧм уджсӧ нуӧдӧмыс.

Босьтам кооперативъяслысь вузасьӧм. Вермас оз сійӧ паськавны, крестьянин кӧ омӧля олӧ, уна кӧ сылӧн сьӧмыс весьшӧрӧ важ нога, пемыд олӧмысла вошӧ? Дерт, вузасьӧмыд оз паськав. Сідзкӧ кооперативъяслы колӧ зільны лэптыны крестьяналысь овмӧссӧ, колӧ ӧзйӧдны, пӧвадитны крестьянаӧс агрономъясӧн велӧдӧм ног видз-мунысӧ уджалӧм вылӧ. Та кузя кооперативъяслы колӧ отсавны восьтавны видз-му уджалӧмӧ велӧдчан кружокъяс, вӧчлывлыны докладъяс видз-му уджалӧм йылысь, сідз водзӧ. Тадзиӧн крестьяна ассьыныс овмӧснысӧ лэптасны, кооперативлысь вузасьӧмсӧ паськӧдасны, кооперативӧс озырмӧдасны.

Ӧні уналаын кооперативъясысь уджалысьясыс гусясьӧны, лотайтӧны эмбурсӧ (тӧварсӧ, сьӧмсӧ). Тайӧ лоӧ, уджалысьясыс ыджыд бурсӧ да коланлунсӧ кооперативъяслысь оз на тӧдны да. Быд бур гӧгӧрвоысь уджалысьлы кооперативын колӧ лӧсьӧдны тӧлка, честнӧй служащӧйясӧс, медым гӧгӧрвоӧны вӧлі, кутшӧм ыджыд удж нуӧны найӧ, сьӧлӧмсяньныс уджалісны кооператив ёнмӧм кузя.

Сідзкӧ быд кооперативлы, мед кӧть сійӧ кутшӧм ичӧт да гӧль вӧлі, колӧ нуӧдны йӧзӧс югдӧдан удж.

Кыдзи, кутшӧм сямӧн нуӧдны тайӧ уджсӧ кооперативъяслы? Та йылысь эм шуӧм коммунист партияса Центральнӧй Комитетлӧн. Сэні тшӧктӧны зільны быд кооперативлы лӧсьӧдны, велӧдны кооперативъясын уджалысьясӧс. Сэсся кооперативъяслы колӧ быд ногӧн отсасьны крестьяналы нигаяс вузалӧм кузя, паськӧдны крестьяна пӧвстӧ гижӧдъяс кооперация йылысь. Шуӧмас тшӧтш тшӧктыссьӧ кооперативъяслы зільны висьтавлыны йӧзлы кооперация йылысь, сійӧ коланлун йылысь. Тайӧ уджсӧ паськыда крестьяна пӧвстын нуӧдӧмӧн кооперативъяс вӧчасны ыджыд удж йӧзӧс югдӧдӧм кузя.

К—в.