ОЗ КОВ СОДТЫНЫ

Август 28 лунӧ Палаззяса вичкоын (Сыктыв уезд) вӧлі собранньӧ вичкоӧ ветлысь войтырлӧн. Поп тайӧ собранньӧ вылад корис аслыс быд тӧлысь мынтыны квайт шайтӧн да сетны дон босьттӧг патера. Тайӧ мукӧд пӧлӧс доходъяс кындзи. Первойсӧ войтырыс шулісны сетны тайӧ ставсӧ, но этша йӧз вӧснаыс колисны мӧд собранньӧ кежлӧ.

Тайӧ собранньӧ бӧрас со жӧ эськӧ кутшӧм сёрнияс позьӧ кывзыны мужикъяс костын да.

— Тэ нӧ, Семен дядь, кытчӧ ветлін?

— Ме вичкоӧ, собранньӧ вылӧ, поп корӧ жалӧванньӧ да.

— Мый нӧ сэсся шуисны?

— Мынтыны пӧ тай сылы квайт шайтӧн тӧлысь ковмас.

— Но-о! Лучшӧ жӧ эськӧ мыйкӧ босьтны сы вылӧ да!

— Сэсся пӧ, коді оз кут мынтыны, сійӧс вичкоӧ огӧ и лэдзӧй! Ладнӧ абу, Габӧ, тадзтӧ?

— Менӧ кӧ оз кутны лэдзны вичкоад, ме кая да ассьым пай кирпичсӧ нетшка вичкосьыд! Иконостассӧ вӧчигас ме деньгасӧ тшӧтш пуктылі: кая да иконостассӧ ассьым пай косяла. Жалӧванньӧ сетӧм пыдди попыслы колӧ пуктыны налогсӧ сё шайтӧн тӧлысь.

— Но-о, тэ тай, Габӧ, чорыда жӧ!

— А мед колӧкӧ регыдджык миянысь весасясны кузь юрсиаясыд, йӧзӧс ылӧдлысьясыд!

— Ме тадз жӧ чайта. Колӧ поплы жалӧванньӧ мынтӧм пыдди сійӧ сьӧм вылас судзӧдны кутшӧмкӧ видз-му уджалан машина.

Гаврил Миш.