АТТӦ, ЗОНМӦ, БАРА НА ЭГӦ ТӦДЛӦЙ!

(Трактор йылысь больгӧм)

Сентябр 8-ӧд лунӧ, 183-ӧд номерын «Югыд туй» газетын, гижлім чолӧмбыттьӧ медводдза тракторлы. Тайӧ лунъясӧ пӧ Сыктывдінкарӧ воас трактор «Фордзон». Сы бӧрын сэсся — «ни слуку, ни дуку» сы йылысь.

— А лӧсьыда пӧ, зон, тракторыд гӧрӧ! — шуӧ тӧрыт редакцияын ӧтик сэтчӧс уджалысь.

— Кутшӧм трактор? — друг ме юалі.

— Кутшӧм трактор? Тракторыд пӧ, кывсьӧ, воӧма нин важӧн да.

— Воӧма?

— Воӧма пӧ, другӧ, воӧма. Гӧрӧ нин пӧ и...

— Кӧні но гӧрӧ?

— Кӧнкӧ пӧ тай гӧрӧ-а. Ме ог тӧд, кӧні гӧрӧ. Юра пӧ и, пукаланін пӧ эм и. Кӧкъямыс часӧн пӧ кык десятина да джын гӧрӧ.

— Но, ми тай нӧ бара эгӧ кывлӧ трактор воӧм йывсьыс?

— Ми нӧ мый! Ми ӧд быдтор медбӧрын кылам, мый вӧчсьӧ карад, — ачыд тай гижлін нин сы йылысь.

— Сідз эськӧ да, ме чайтлі: мися, сы бӧрын сэсся водзджык нин кутам тӧдны.

— Виччысь... Кутас кодкӧ трактор йылысь гижны газетӧ. Мый нӧ сійӧ тракторыд? Абу на ӧд кутшӧмкӧ поп. Выль поп кӧ эськӧ локтіс татчӧ, медвойдӧр сы йылысь кодкӧ гижис-а...

Збыльысь нӧ воис тракторыс, али эз?

Аттӧ, зонмӧ, бара на, гашкӧ, ми медбӧрын сы йылысь тӧдам да?