БУР УДЖАЛЫСЬЯС ВОЛИСПОЛКОМӦ!
Бӧрйӧй бур представительясӧс сиктъясын!
Мед бура кутас уджавны волисполком, мед бур уджалысьяс лоӧны сэні, ӧні тайӧ перевыбор дырйи, быдӧнлы, быд сиктын колӧ мӧвпыштны: кодъясӧс пуктавны сӧветӧ, исполкомӧ. Мед эськӧ волисполкомӧ бӧрйӧм войтырыс кутасны тӧждысьны став вӧлӧсьтса овмӧс пондаыс. Мед эськӧ пондасны уджавны зіля, ас окотаысь, мед эськӧ найӧ исполкомас волывлісны эз сӧмын сы понда, мый найӧс пуктӧмаӧсь да, быть волывны лоӧ, ныртӧ мыччывны.
Колян воясын та йылысь омӧля думайтлывлісны: бӧрйылісны коді вӧлі прӧст и видзӧдісны исполкомын уджалӧм вылӧ кыдзи кутшӧмкӧ наказанньӧ вылӧ. Бӧрйысигад сідзи и вӧлі шуӧны: сійӧ пӧ некӧн на эз овлы, позьӧ жӧ ӧд и сылы олыштны сэні, мукӧдыс тай кымынлаын нин олісны да.
Татшӧмъяссӧ коми сиктъясын тайӧ бӧрйысян кампанньӧ дырйи колӧ дзикӧдз бырӧдны. Колӧ бура водзджык тӧдмавны войтырсӧ да бурджыкъясӧс бӧрйыны.
Ещӧ на мӧд пӧлӧс омӧльтор вӧлі колян перевыборъяс дырйи: оз вӧлі ставныс волыны перевыбор вылӧ, медся нывбабаяс: метӧг пӧ нин сэні бӧръясны. Ме понда оз нин сувт. Тадзтӧ вӧлі чукӧрмылас сиктад 100 морт письыд сӧмын морт 30−40. Сэсся и семья пытшкад кӧ, шуам, 4−5 бӧрйысьысь — мунӧ сӧмын ӧти морт либӧ некод оз мун.
Таво, тайӧ перевыбор дырйи, оз нин ков тадз вӧчны.
Став мужчина и нывбаба 18 арӧссянь мунӧ перевыбор вылӧ сиктъясын!
Мед бура кутас уджавны волисполкомыд, мед овмӧсныд вӧлӧсьтад кыптас — бӧрйӧй бурджык представительясӧс сиктъясад!
Мед жӧ кыптас вӧлӧсьтпытшса овмӧс, мед бурмас овмӧс Обласьтын, Республикаын!
