ИЧӦТИКА ВИДЗ-МУӦН ВӦДИТЧӦМ ЙЫЛЫСЬ

Юалӧм. Вермасны оз босьтны выль видз-муысь да кӧлуй уловысь пай дӧва моньлысь мужикладорса рӧдняыс (бать, вок, чой), юксьӧмӧн да торйӧн кӧ овлісны найӧ?

Висьталӧм: Оз вермыны. 418 статья Гражданскӧй кодекс серти, вермӧны сӧмын со кодлы сетны: аслас челядьлы, внукъяслы да правнукъяслы, ловъя гӧтырыслы, уджавны вермытӧм да нинӧм абутӧм йӧзлы, воысь дыр кӧ найӧ олісны морт кувтӧдзыс сы ордын. 73 статья Земельнӧй кодекс серти, кулӧм бӧрын кольӧм видз-му да кӧлуй позьӧ юклыны сӧмын сійӧ кӧзяйствоас олысьяс костын.

Юалӧм: Мужик кулӧм бӧрас воштӧ оз дӧва ассьыс права выль видз-му вылӧ да кӧлуй вылӧ, босьтас кӧ ас дінас выль мужикӧс?

Висьталӧм: Оз вошты. Колӧ сӧмын босьтӧм мужиксӧ волисполкомын гижӧдны выль кӧзяйствоас, тадзи тшӧктӧ 72 статья Земельнӧй кодексын.

Юалӧм: Мужик кулӧм бӧрын воштӧ оз дӧва ассьыс права выль видз-му вылӧ да кӧлуй вылӧ, мунас кӧ верӧс сайӧ мӧд кӧзяйствоӧ?

Висьталӧм: Кӧлуй вылӧ права оз вошты: кӧть аслас земельнӧй обществоӧ петӧ верӧс сайӧ, кӧть мукӧд земельнӧй обществоӧ (тадзи висьталіс Верховнӧй Суд март 16 лунӧ 1925 воӧ); выль видз-му вылӧ права воштӧ, мунӧ кӧ верӧс сайӧ мукӧд земельнӧй обществоӧ. Аслас земельнӧй обществоӧ позьӧ мунны верӧс сайӧ став видз-муӧн и кӧлуйӧн. Эм кӧ важ мужиксянь посни челядь, колӧ сы вылӧ опекунсянь разрешенньӧ.

Воддза мужиклӧн рӧдняяслы торйӧн кӧ вӧлі олӧны, некутшӧм права видз-му вылӧ да кӧлуй вылӧ оз сетсьы.

Юалӧм: Вермас оз нывбаба, петӧма кӧ вӧлі верӧс сайӧ мукӧд земельнӧй обществоӧ, бӧр локны важ кӧзяйствоас да корны видз-му пай?

Висьталӧм: Оз вермы. Земельнӧй кодекс 66 статья серти, позьӧ босьтны кӧзяйствоӧ сӧмын: гӧтырӧс (гӧтрасьны либӧ пыртны), либӧ ӧтсӧгласӧн кор став семьяыс быдтас пыдди кодӧскӧ босьтӧны.

Быдтас пыдди босьтны позьӧ, земельнӧй общество кӧ скод вылын разрешитас. Ӧткажитас кӧ, позьӧ водзӧ мӧдӧдчывны, норасьны вӧлӧсьтса земельнӧй комиссияӧ.

Обласьтувса видз-му управленньӧ.