НАРОДНӦЙ СУДДЯ ОТСАЛАС КРЕСТЬЯНИНЛЫ

Коми крестьянин зэв на омӧля тӧдӧ законъяс. Оз на куж, оз тӧд, кӧнджык, коді вермас налы закон висьтавны, колан туй индыны. Тӧдтӧм понда крестьянин (пӧрысь старукаяс ставныс) мунӧ поп ордӧ либӧ купеч ордӧ, корӧ найӧс гижны прошенньӧ. Поп да озыр морт бур вылӧ оз велӧдны да ӧнія закон оз тӧдны; гижасны кӧ прошенньӧ, босьтӧны сьӧм. Коми крестьянин оз тӧд, коді эськӧ вермас сылы отсавны. Быд вӧлӧсьтын эм ӧні лыддьысян керка, сэні эм (кӧні абу — колӧ лӧсьӧдны) справочнӧй бюро либӧ юридическӧй юкӧд. Сэні дон оз босьтны, заявленньӧтӧ гижасны да индасны, висьталасны, мый колӧ вӧчны — кыдзи колӧ.

Лыддьысян керкаын эськӧ вермасны крестьянинлы индыны колан законсӧ, туйдӧдны. Сӧмын сэні уджалӧны ми вок кодь жӧ омӧлика велӧдчӧм йӧз. Эм деревняын ёна тӧдысь морт, став законыс сылӧн ки улас. Сылы законыс ачыс тшӧктӧ отсӧг сетны уджалысь йӧзлы. Сійӧ мортыс — Народнӧй суддя.

Коми крестьянинӧс кӧ мог вӧлі суас суддя дінӧдз, первой вӧлі корӧ кодӧскӧ гижны прошенньӧ, пасйыштны заявленньӧ — полӧ вӧлі суддясьыс, прошенньӧтӧг оз лысьт вӧлі локны. Крестьянин оз вӧлі тӧд: позьӧ оз кывйӧн висьтавны ассьыс могсӧ суддяыслы. Суддялы закон тшӧктӧ аслыс пасйыштавны крестьяналысь заявленньӧяссӧ. Тадзинад крестьянинлы оз ков поп ордӧ да купеч дінӧ мунны — суддяыс ачыс вӧчас ставсӧ.

Коми йӧз, веськыда мунӧй суддя дінӧ, корӧй сылысь мый тіянлы колӧ, юасьӧй законъяс йылысь!

Н. К.