1925−1926 ВОСЯ СТРАХОВКА

Совет Труда и Обороны кывзіс Госстрахса представительлысь, Рыбников ёртлысь, доклад: сиктъясын обязательнӧй страховка йылысь 1925−1926ʼ во вылӧ.

Тайӧ докладсӧ кывзӧм бӧрын да ёна сы йылысь сёрнитӧм бӧрын Совет труда и Обороны шуис 1925−1926ʼ во кежлӧ лӧсьӧдны обязательнӧй страхуйтӧм сиктъясын биысь 62 автономнӧй республикаясын, обласьтъясын да губерняясын, сэсся кымынкӧ округын Уральскӧй обласьтын да войвыв Кавказын, 42 округын Украинаын да став Белоруссия республика пасьтаыс.

Кӧдзаяс шерысь да скӧтӧс усьӧмысь обязательнӧ страхуйтны сӧмын кӧні Сӧветъяслӧн съездъясыс либӧ исполкомъяслӧн пленумъясыс колян во лӧсьӧдлісны сэтшӧм страхуйтӧмсӧ да сентябр 1-ӧд лунӧдз кӧ эз вӧчлыны постановленньӧ бӧр вежны страхуйтӧмсӧ.

СССР-са Экономическӧй Сӧвещанньӧлы сетсьӧ права торъя обласьтъясын, республикаясын чинтыны ли содтыны страхуйтан донсӧ, сӧмын мед эз ло вылӧ либӧ улӧ кызь прӧчентысь воддза лӧсьӧдӧм донсьыс. Сӧмын войдӧр Экономическӧй Сӧвещанньӧыслы колӧ воны ӧти кывйӧ сійӧ обласьтса либӧ республикаса финанс комиссариатыскӧд. Страхуйтӧмсьыс донсӧ колӧ мынтыны октябр 1-ӧд лунсянь декабр 31 лунӧдз 1925 воын.

СССР Экономическӧй Сӧвещанньӧлы бара сетсьӧ права торъя республикаясысь, обласьтъясысь да губерняясысь нюжӧдны мынтан сроксӧ, мыйкӧ вӧсна кӧ йӧзыслы сэки ёна сьӧкыд мынтыныс, март 31-ӧд лунӧдз 1926 воын. Сыысь дырсӧ мынтан сроксӧ Экономическӧй Сӧвещанньӧыс оз нин вермы лӧсьӧдныс.

Совет Труда и Обороны шерысь да биысь страхуйтігӧн лӧсьӧдіс дзикӧдз мездыны (освободить) страхуйтан дон мынтӧмысь зэв гӧль крестьянаӧс, сэсся кутшӧмкӧ приччаяс суӧм крестьянаӧс, красноармееч семьяясӧс да ас вӧляысь лӧсьӧдӧм пӧжарнӧй организацияяс, сӧмын мед дзикӧдз мынтӧмыс (освобожденных) эз вӧв 15 прӧчентысь унджык став страхуйтӧм кӧзяйство пытшсьыс.

Скӧт страхуйтігӧн дон мынтӧмысь дзикӧдз мездыссьӧны зэв гӧль да кутшӧмкӧ приччаясӧн суӧм кӧзяйствояс, сэсся омӧльджык кӧзяйствояс, кодъяслы сетӧмаӧсь удждысян тӧвариществоясысь ли кысь ли уджӧн сьӧм овмӧссӧ кыпӧдӧм вылӧ, да ас окотаысь лӧсьӧдӧм пӧжарнӧй организацияяс, сӧмын мед дзикӧдз мездӧмыс эз вӧв 10 прӧчентысь унджык став страхуйтӧм кӧзяйство пытшсьыс (вӧвъяс страхуйтігӧн 7½ прӧчент). Кокньӧдъяссӧ сеталӧм йылысь (кодъяслы да кыдзи) лючки лӧсьӧдаласны торъя инструкцияясӧн быд республикаса Экономическӧй Сӧвещанньӧяс.