БУР ТУЙ БУРА ВЕЛӦДЧЫНЫ!

Талун Сыктывдінкарсянь колльӧдам Гӧрд армияӧ медводдза новобранечьясӧс, 1903 воын чужысьясӧс.

Войдӧр салдатӧ мунлісны ырзӧмӧн-бӧрдӧмӧн. Сэки вӧлі водзвыв тӧдӧны, кутшӧм лоӧ олӧмыс служба вылас — ӧти мученньӧ вӧлі нёль во чӧж; салдатӧс эз пуктывны морт пыдди; салдатлӧн некутшӧм права эз вӧв, найӧ вӧліны кывтӧм пемӧсъяс кодьӧсь, нӧйтлісны найӧс быд ыджыдджык начальство; салдатъяс эз гӧгӧрволыны сэки, мыйла найӧ служитӧны, кодӧс дорйыны служба вылас найӧс босьтлісны. Эськӧ сэки уджалысь йӧз пиянӧс нулісны сы вылӧ, медым наысь сэні вӧчны бур оружйӧ сулавны сар дор, вера дор да озыръяс власьт дор; медым салдатъяс вынӧн мырддявны мукӧд государствояслысь оланінсӧ (мусӧ), видзны озыръяслысь да сарлысь власьтсӧ, медым эз воны на вылӧ уджалысь йӧз да эз босьтны найӧ власьтсӧ ас кипод уланыс. Сэсся салдатъяс семьялы эз сетлыны войдӧр некутшӧм отсӧгъяс гортса олӧмыслы.

Ӧні салдатын служитӧмыс ставнас мӧдногса. Срокыс дженьыд. Служитны кокньыд. Гӧрдармеечьяслӧн праваыс ӧткодь став уджалысь йӧзкӧд. Командиръяс оз нӧйтны, найӧ ёрта-ёртлы дорӧ моз шыасьӧны гӧрдармеечлы. Гӧрд армияыд — школа. Велӧдӧны военнӧй делӧ, кындзи бурджыка овны, выль олӧм стрӧитны.

Гӧрд армияӧ ӧні мунӧны нимкодьпырысь. Мунысьяс ӧні тӧдӧны: найӧ мунӧны велӧдчыны, кыдзи колӧ видзны врагъясысь ассьыным сӧветса государствонымӧс; найӧ чорыда сулалӧны крестьяна да рабочӧйяс дор, медым найӧ бурджыка (повтӧг) вермисны гортын уджавны, овмӧс кыпӧдны. Гӧрдармеечьяс тӧдӧны, коді миян враг, коді миян вылӧ эралӧ, коді миянлы война лӧсьӧдӧ.

Гӧрдармеечьяслы сӧвет власьт медвойдӧр сетӧ быдсяма кокньӧдсӧ, торъя нин налогъясысь.

Гӧрдармеечьяс служба бӧрын локтасны гортаныс сюсь войтырӧн, велӧдчӧмӧн, оласног гӧгӧр тӧдмалӧмӧн; найӧ лоӧны бур уджалысьяс деревняын, крестьяна пӧвстын.

Ӧні срок кольӧ 1902 воын чужысьяслы. Найӧ регыд гортаныс локталасны. Найӧс вежны и мунӧны 1903 воын чужысьяс.

Талун, медводдза 1903 вося новобранечьясӧс Гӧрд армияӧ колльӧдігӧн, ми налы сьӧлӧмсянь сиам:

— Бура велӧдчӧй! Энӧ тӧждысьӧй гортса олӧм понда — сӧвет власьт тіян семьялы отсалас! Топыда кутӧй винтовканытӧ кианыд, чорыда сулалӧй Сӧветса государство дор, видзӧй сійӧс лёк врагъясысь! Энӧ полӧй, ми ӧні ёнӧсь нин; тіян мышку сайын сулалӧны уна-уна миллион уджалысь йӧз, война кӧ кыпӧдасны озыръяс — став уджалысь йӧзыс налы паныд сувтасны!

Бур туй тіянлы, ёртъяс!