НЫВБАБА КОСТЫН ЁНДЖЫКА УДЖАЛӦЙ!
Миян газетӧ юӧръяс воӧм серти тӧдчӧ: зэв на омӧля югдӧмаӧсь коми нывбабаяс, зэв на этша водзӧ мунӧмаӧсь революция бӧрын.
Партиялы, комсомоллы, профсоюзъяслы, став культурнӧй удж нуӧдысьяслы колӧ ӧнісянь жӧ босьтчыны уджавны нывбабаяс костын. Уджавны колӧ пыр, коставлытӧг, арбыд и тӧвбыд. Ӧні нывбабаяс прӧстджыкӧсь, налӧн собранньӧяс вылӧ, лекцияяс вылӧ волывныс ӧні пӧраыс эмджык.
Коми деревняын олӧмыс ёна на нывбабаяс сайын. Посни челядьыд да томуловыд ставныс нывбабаяс улын (мамъяс кипод улынӧсь). Челядьыс эськӧ и кӧсйӧны лёк пемыд олӧмсьыс петны да, мамъясныс унджыксӧ на кутӧны. Со босьтам кӧть тайӧ примерсӧ.
Паджгаын (Сыктыв уездын) эм комсомолеч Шеболкин Иван. Неважӧн сійӧ ячейкаса секретарыскӧд вӧлӧм гижӧны стенӧ ӧшӧдан газет. Сэтчӧ Ванялӧн мамыс (Спира Матрен) локтас беддьӧн. Уськӧдчӧма пиыс вылӧ да зэв ёна нӧйтӧма — кызьысь кымын бедьнас кучкӧма, юрас и быдлаӧ веськалӧма, да быд ногыс видӧма писӧ и РЛКСМ ячейкаса секретарсӧ: «Дзонь лун тані олан! Мый чӧртсӧ гижан век?» — шуалӧма пиыслы бедьнас сеталігӧн.
— Некор татчӧ Иванӧс эн лэдз! Тайӧ кутшӧм патера пернатӧм морӧсъяслы? — горӧдӧма секретарыдлы да бедьнас пызанас сэтшӧма косьыштӧма, весиг секретарыс повзьӧма. Иваныс сэсся рытнас абу волӧма ячейкаса собранньӧ вылас.
Татшӧмыд паськыд Коми мусьыд уна на сюрас. Ставыс татшӧм лёкыс артмӧ нывбаба пемыдлун понда. Спира Матренъясыд миян оз на гӧгӧрвоны став бурлунсӧ выль олӧмыслысь, абу на налӧн мывкыдыс важсьыс бергӧдчӧма. Колӧ вежӧръяссӧ налысь югдӧдны, медым найӧ вежсясны да наысь лоасны прамӧй Матрен ёртъяс.
Босьтам мӧдтор (талунъя газетысь). Расчойын (Сыктыв уездын) ӧтик аньӧс, Наста нимаӧс, шуӧны «лукавӧй телегаӧн». Сы ордын олӧ ӧтик нывка (кага видзысь); сійӧс ёна Настаыд нӧйтӧ. Мыйла сідзи? Гашкӧ, сійӧ збыльысь кутшӧмкӧ «ёма» кодь, гашкӧ, ачыс сэтшӧм пемыд, оз тӧд ӧнія ногса олӧмсӧ. Сэтшӧмъясыд бара жӧ уна сюрасны Коми мусьыд. Налысь сідзжӧ колӧ юр вемнысӧ югдӧдны, медым лоины Наста ёртъясӧн, а эз «лукавӧй телегаясӧн» либӧ «ёмаясӧн».
Унатор на позьӧ гижны. Сӧмын гижӧдӧн быд коми аньӧс он вермы велӧдны. Колӧ на костын уджавны, бура уджавны. Уджыс и оз мун, буракӧ. Весиг Позтыын (Кулӧмдін уезд) нывбаба костын уджалӧм сулалӧ — сэні эськӧ унджык уджыс нин пыр буракодь мунліс да.
Колӧ быдлаын кутчысьны тайӧ уджас. Оз ков вунӧдны: нывбаба сайын зэв унатор миян коми олӧм костын.
