«КРАСНӦЙ КРЕСТ» ОБЩЕСТВОЛӦН ОТРЯД УДЖАЛӦ

Кебра вӧлӧсьтын (Сыктыв уезд) ӧні уджалӧ отряд «Краснӧй Крест» нима. Лечитчысь вӧлі уна, морт сюрс саяс нин вӧлӧма гӧгӧр сиктъясысь. Докторъяс шуӧны: Кебраын пӧ медуна висьысь трахомаӧн (сэтшӧм нима син висьӧм). Докторъяс вӧчӧны уна операция. Мукӧдыс абу аддзывлӧмаӧсь да, ӧні кутісны аддзыны (синмасьӧмаӧсь).

Медым унджык йӧз воласны лечитчыныс, комсомолечьяс да служащӧйяс ёна висьталісны йӧз пӧвстас лечитчӧмыслысь коланлунсӧ. Докторъяс уджалӧны лунтыр — 7 час асывсянь да пемыдӧдз, оз тӧдлыны некутшӧм шойччӧг. Крестьяна тайӧ уджсьыс ёна ошкӧны сӧвет власьтӧс. Август 28-ӧд лунӧ комсомолечьяс собранньӧ вылын отрядсьыс ӧти морт вӧчис доклад «Краснӧй Крест» общество йылысь. Доклад бӧрас став комсомолечьяс дай мукӧд гижсисны тайӧ обществоас.

Ми, Кебраса, медвойдӧр Коми обласьтын организуйтім «Краснӧй Крест» обществосӧ. Корам и мукӧдӧс тадзи вӧчны.

Ыджыд аттьӧ сӧвет власьтлы йӧзлы отсӧг сетӧм вылӧ!

Ванька Окопов.