ГАЗЕТӦ ГИЖНЫ ПОЗЬӦ БЫД КРЕСТЬЯНИНЛЫ

Ме дінӧ неважӧн шыасис ӧти крестьянин со кутшӧм могӧн: талун пӧ Пальсянь воліс скӧт пельшӧр да немтор эз вӧч, весиг пӧ висьысь скӧтӧс эз видлав, сідзи пӧ бӧр муніс, вай пӧ, другӧ, позьӧ кӧ, гиж та йылысь газетӧ.

Тайӧ крестьяниныс ачыс кужӧ гижны; ме сылы шуи: аслыд, мися, колӧ гижны. Сійӧ сы вылӧ шуис: ме пӧ абу селькор.

Татшӧм йӧзыд Коми му пасьтаыд зэв уна. Найӧ аддзӧны газетӧ гижӧмлысь коланторсӧ, да думайтӧны, газетад пӧ гижны позьӧ сӧмын селькоръяслы.

Коми крестьянинлы колӧ тӧдны, гӧгӧрвоны: газетӧ гижны позьӧ быд мортлы.

Селькоръяслы колӧ та йылысь сёрнитны крестьянакӧд.

Селькор Часса Ӧль.

Редакциясянь. Веськыда шуӧ Часса селькор: газетӧ позьӧ дай колӧ гижны быд крестьянинлы. Селькоръясыд ӧд крестьяна костысь жӧ петісны. Селькоръясӧс некод оз бӧрйы ни, некод оз пукты ни — найӧ асьныс газетӧ гижан уджас кутчысьӧны.