ПЕЗМӦГЫН (КУЛӦМДІН УЕЗД)

Заводитісны муяс мерайтны. Приговор вӧчигӧн шуисны: колӧ пӧ бырӧдны посни муяс да видзьяс. Ыліса муяс бырӧдны оз позь со мый понда: ӧтар вӧлӧсьт помас муыс няньсӧ вайӧ бурджыка мӧдар пом сертиыс, а бурджык мусьыд ӧд тӧдӧмысь быдӧнлы колыштӧ пайтор.

Колян тулыс заводитлісны стрӧитны выль школа I ст., но ӧні вӧчӧмсьыс лои дугдыны, сьӧмыс быри да. Мыйӧн утвердитасны смета выль во кежлӧ, сэки бара заводитасны сійӧ уджсӧ уджавны.

Крестьяна, ӧдйӧджык вӧчӧй школатӧ, мед вермасны велӧдчыны тіян челядьныд!

Комсомол ячейка уджалӧ шӧркоддьӧма. Воспитательнӧй удж муніс; медся ёна вӧлі пуктӧма удж призывникъяс костын.

Вӧчлісны ӧти субӧтник гӧль дӧвалы отсасьны. Чукӧрмылісны 12 морт, шабдісӧ керисны.

Ӧні ячейкаын удж нуӧдысьясыс мунісны призыв вылӧ да, дерт, кӧнкӧ уджыд омӧльджыка кутас мунны.

Жель.