ЫДЖЫДВИДДЗЫН (КУЛӦМДІН УЕЗДЫН)

Коммунист партия ячейкаын 5 шлен да 8 кандидат. Таво январ тӧлыссянь майӧдз велӧдісны шленъясыс да кандидатъясыс политграмота, коммунист партиялысь уставсӧ, сельскӧй кӧзяйство йылысь да мукӧдтор.

Таво быдпӧлӧс кампанияяс нуӧдісны мукӧд вося серти бурджыка, выль пырысь кандидатъясыс зэв зіля уджалісны да. Собранньӧяс тӧлысьнас овлывлӧны 3−5 кымын. Кызысьсӧ собранньӧяс вылӧ позьӧ вӧлі пырны беспартийнӧй йӧзлы. Коммунистъяс да кандидатъяс оз на вермыны крестьяна костас асьнысӧ сувтӧдны кыдз колӧ, кызыс на пытшкысь малограмотнӧй да. Крестьянаыд частӧ шыасьлӧны на дінӧ кутшӧмсюрӧ могӧн, да коммунистъясыд унаысь на оз вермыны найӧс могмӧдны, асьныс оз тӧдны да. Сы вӧсна жӧ эз вермыны индавны вӧлӧсьтувса удж нуӧданінъясын уджсӧ нуӧдны.

Волисполком уджаліс омӧлякодь. Волисполкомса секретарыс нёль тӧлысь эз уджав волисполкомас: войдӧр ветліс военнӧй подготовка (сійӧ призывник вӧлі), сэсся — волисполкомса секретаръяс курс вылӧ. Председательыс малограмотнӧй да, секретарыслысь уджсӧ эз вермы нуӧдныс. Да ещӧ сійӧ жӧ вӧлі коммунист партия ячейкаын секретарын. Сідзсӧ эськӧ став волисполкомса шленыс уджалісны зэв зіля.

Видз-му комиссия (волземкомиссия) уджаліс бура. Август 20-ӧд лунсянь сентябр 1-ӧд лунӧдз сэтчӧ воліс кызь делӧ. Дас сизим делӧсӧ комиссияыс видлаліс нин, сӧмын куим делӧ коли.

Кооперативлӧн уджыс воддза серти бурмис. Ӧні кооперативӧ зільӧныджык вайны дай вайӧны крестьяналы колан тӧвар. Правленньӧыс юасьӧ крестьяналысь, кутшӧм тӧвар налы ёнджыка колӧ. Сӧмын кооперативлӧн ӧти бок омӧльджык: крестьяналы вывті уна сеталіс тӧварсӧ уджӧн. Ӧні крестьяна сайын лыддьыссьӧ уджйӧз 20.241 шайт. Таво кӧ крестьяналы оз сюрны нажӧткаяс, налы зэв омӧль лоӧ.

Лыддьысян керка уджаліс лӧсьыда. Избач волывліс тӧв и гожӧм лыддьысян керкаӧ быд лун. Лыддьысян керка бердын вӧлі лӧсьӧдӧма кружокъяс: политграмота велӧдан, сьылан да безбожник. Спектакъяс тӧвнас сувтӧдлісны тӧлысь пиын куимысь кымын. Школаын велӧдысьяс ёна быд ног отсалісны лыддьысян керкаын уджалігӧн.

Джиян сиктын эм сельскокӧзяйственнӧй кооперативнӧй тӧварищество. Тӧвариществоас 41 шлен. Уджас шленъясыс кутчысисны зэв зіля. Гӧпъяс косьтӧмӧ налӧн муні нин 160 пӧденщина. Уджсӧ помавтӧдзыс ещӧ колӧ уджавны 100 пӧденщина кымын. Сэсся пӧскӧтина улӧ весалісны вӧр улысь 7 десятина. Гожӧм кежлас тӧвариществолы уджсӧ лои сувтӧдлыны. Ӧні бара кӧсйӧны кутчысьны уджас. Регыд воасны Сельхозбанкысь видз-му уджалан машинаяс. Сельхозбанкысь тӧвариществоыс корліс удждыны сьӧм, да мыйлакӧ сійӧ эз сет.

Альберт.