МЫЙ СЕТӦ «ЭЛЕКТРИФИКАЦИЯ»

Югдӧдӧ куим деревня. — Уджавны зэв ёна кокньӧдӧ. — Выставка воссяс.

Айкатылаын (Емдін у.) 1924 воын март тӧлысьын воссьыліс электричество лӧсьӧдан тӧварищество. Войдӧрсӧ шленас пыраліс морт 80 кымын. Ӧні сэні шленыс кыксё гӧгӧр дай пыралӧны на ёна. Ӧнӧдз тӧварищество нуӧдліс электричествосӧ кык сиктӧ: Айкатылаӧ да Шожымӧ. Таво гожӧм вайисны выль динамо-машина да тӧв кежас кӧсйӧны югдӧдны ещӧ Ичӧт Айкатыла. Шленскӧй взносыс тӧвариществоас пыригӧн вит шайт да вступительнӧй ещӧ ӧти шайт. Ставсӧ ӧнӧдз тӧварищество нуӧдіс 200 лампочка.

Тайӧ лунъясӧ тӧварищество виччысьӧ электромотор. Электромоторнас кутасны вартны, пес пилитны, вый вӧчны да мукӧдтор. Электромоторыс сулалӧ шайт 350 гӧгӧр, пондас уджавны нёль вӧв мында. Дерт, тӧварищество ӧтнас эз вермы ёнмыны, эз кӧ некод отсав. Обисполком сетліс 1000 шайт да кооперативлы эм уджйӧз 2000 шайт гӧгӧр. Ставсӧ кӧ артавны уджйӧзсӧ тӧвариществоыслысь, лоӧ дас сюрс кымын шайт. Унджыкӧн кӧ крестьяна пыраласны шленъясӧ, дерт, кокньыдджык лоӧ тӧвариществолы, ӧдйӧнджык сійӧ сувтас кок йылас. Крестьяналы ёнджыка колӧ пыравны шленӧн тӧвариществоӧ, вӧчны Ленин ёрт тшӧктӧм серти.

Сентябр 9-ӧд лунын вӧлі тӧвариществоса шленъяслӧн собранньӧ. Сэні шуисны вӧчны сельскокӧзяйственнӧй выставка сентябр 21-ӧд да 25-ӧд лунъясӧ. Сійӧ выставка вылас кӧсйӧны петкӧдлыны электромоторӧн вартӧм да мукӧд пӧлӧс удж нуӧдӧм. Сэсся выставка вылӧ кӧсйӧны лӧсьӧдны уна пӧрӧда порсьяс, быдпӧлӧс град выв да му выв пуктасъяс, кодъясӧс вӧдитӧны Айкатылаын да Шожымын. Сэсся собранньӧ шуис корны Обисполкомлысь, мед сійӧ выставка вылас ыстас агроном В. А. Исаковӧс да ещӧ ассьыс представительсӧ. Ми чайтам, Обисполком локтас миянлы паныд тайӧ бур уджын.

Сыс пи Вань.