КОМИ ГОСТОРГ, МЫЙ НӦ ЛАНЬТӦМЫД?

Кад нин видзӧдлыны Шаков вылӧ

Пожӧгын (Кулӧмдін уездын) эм агент Коми Госторглӧн — Шаков Иван Педӧт. Мыйсюрӧ йылысь сійӧс унаысь нин гижлісны газетын. Сӧмын тай Коми Госторг оз кывлы весиг нинӧм.

Августын комиссия видлаліс, уна-ӧ сеталӧма лавкасьыс тӧварсӧ крестьяналы уджӧн. Ӧтпырйӧ видлалісны счётнӧй нигасӧ, тӧдмалісны, веськыда-ӧ сэтчӧ гижалӧма уджйӧзсӧ, ӧткодь абу гижӧмыс тӧварсӧ сеталӧм сертиыс. Вӧлӧма абу ӧткодь. Мукӧд крестьянинлысь уджйӧзсӧ нигаас содтӧма (гижӧма лишнӧй) шайт-мӧдӧдз, мукӧдыслы унджык. Тадзинадтӧ ӧд Шаковыд Госторг водзад сьӧмнас, дерт, судзсяс, крестьяна вылӧ лишнӧйтӧ сюялӧмнад!

Нокӧ, Коми Госторг, мый ланьтӧмыд, мый узян? Оз ӧмӧй позь некыдзи Шаковсӧ вежны?

Тӧдысь.