ГӦГӦРВОИСНЫ КОЛАНЛУНСӦ

Выльгортын (Сыктыв уездын) тӧлысь кымын нин крестьяна пессисны му-видз лӧсьӧдан удж нуӧдӧм йылысь (землеустройство): чукӧртчывлісны торйӧн десятаясын, став вӧлӧсьт кузяыс — собранньӧяс вылӧ. Землемеръяс сэні висьтавлісны, мый бурсӧ сетас сійӧ удж нуӧдӧмыс.

Унджык крестьянаыс вӧлі шуӧны: бурсӧ пӧ миянлы землеустройствоыд нинӧм оз сет, ӧти десятаысь пӧ му-виддзысь петас мӧд десятаясӧ, уналӧн сідзи вошӧ.

Сентябр 6-ӧд лунӧ крестьяна бара чукӧртчисны собранньӧ вылӧ став вӧлӧсьт кузясьыс. Землемер Насонов ёрт висьталӧм бӧрын шуисны: ӧнісянь жӧ кутчысьны му-видз лӧсьӧдан удж дінӧ. Гӧгӧрвоӧмаӧсь нин унджыкыс — важ ног му-видз юклӧмӧн кольччыны тӧлк оз босьт, колӧ бурджыка выль ногӧн му-видз юклӧмӧн олӧм кыпӧдны.

Выльгортса