КОЛӦ ЛӦСЬӦДАВНЫ КОКНЬЫДИК МОТОРНӦЙ ПЫЖЪЯС

Миян Коми обласьтын прамӧй туй абу некӧн. Став надеяным — ва туй — паракодӧн. Но паракод ветлӧ ытва дырйи да арся ва кӧ лоӧ, дай сійӧ неылӧдз. Котлассянь Сыктывдінкарӧ, карсянь Кулӧмдінӧ. Мукӧд вожӧ (Висерӧ, Эжва йылӧ да мукӧдлаӧ) паракод посни юясӧ оз пыравлы; пыравлас кӧ — ӧтчыд ли кыкысь во гӧгӧрӧн. Весиг Эжваас быд гожӧмын миян косьмылӧ да, паракодыд оз ветлыв.

Печӧра кузя туй ньӧти абу, ва туй кындзи; ветлӧны сӧмын пыжӧн бечеваӧн кыскысьӧмӧн.

1916 воясын Печӧра кузя ветлӧны вӧлі моторнӧй пыжӧн. Сэтшӧм пыжнас зэв ӧдйӧ ветлӧны. Моторыс зэв ичӧт, позьӧ быд пыжӧ сійӧс лӧсьӧдны бӧжас винтитӧмӧн, берегӧ воӧм бӧрын босьтны позьӧ. Вӧдитчыны сійӧн зэв кокньыд.

Ме ог тӧд, мыйла сійӧс миянладорын оз лӧсьӧдны. Ме думысь кӧ, позьӧ сійӧ лӧсьӧдны не толькӧ быд тӧргӧвӧй учрежденньӧлы, но и крестьяналы, особеннӧ Печӧрасалы, Изьвасалы да Висер вожсалы — вӧралысьяслы, кодъяслы век лоӧ ветлӧдлыны пыжӧн ю кузя верст 200 да унджык. Оз мешайтчы и ылысь турун пуктысьысьясыслы.

Ме тайӧн кора ёнджыка тӧдысьясӧс шыӧдчыны та йылысь да тӧлкуйтны татшӧм моторнӧй пыжсӧ лӧсьӧдавны.

Л. Дедов.