АНГЛИЯСА ПРОФСОЮЗЪЯСЛӦН СЪЕЗД

Скарборо. Сентябр сизимӧд лунӧ Скарборо карын воссис англияса профсоюзъяслӧн съезд. Съезд вылас воӧмаӧсь 724 делегат, 4.343 сюрс профсоюз шленсянь. Съезд вылас тшӧтш эмӧсь представительяс Канадасянь, Америкасянь, СССР-сянь дай сэсся представительяс Амстердамса Интернационалсянь. Съездсӧ восьтіс англияса профсоюзъяс Сӧветсьыс председательыс Суэльс. Англияса делегацияӧн СССР-ӧ ветлӧм йылысь висьталігӧн Суэльс шуис: англияса делегация пӧ миянлы медвойдӧр висьталіс рабочӧй да крестьяна республика кыптӧм йылысь. Сэсся ставмувывса профсоюзъясӧн ӧтвылысь рабочӧйяс дор уджалӧм йылысь висьталігӧн Суэльс шуис: ми пӧ та йылысь ёна сёрнитлім СССР-са профсоюзъяс Сӧвет представительяскӧд; найӧ пӧ сьӧлӧмсяньыс кӧсйӧны та йылысь воны ӧти кывйӧ ставмувывса профсоюзъяскӧд. Висьтавныс помалігӧн Суэльс шуис: рабочӧйяслӧн пӧ капиталистъяскӧд косясьӧм чорзьӧ. Рабочӧйяс пӧ регыд нин шыбитасны капиталистъясӧс. Россияса республикаысь да Мексикаысь рабочӧйяс петкӧдлӧны став мувывса рабочӧйяслы туй. Индия да Китай лӧсьӧдчӧны, вынмӧдчӧны шыбитны ас вывсьыс капиталистъясӧс. Став мувывса рабочӧйяслы ӧні колӧ лӧсьӧдчыны медбӧръя кось кежлӧ.