ЙӦРӦСДІНЫН ОЛӦМ

(Ыб вӧлӧсьтын, Емдін уездын)

Гырысь йӧзӧс югдӧдан-велӧдан удж Йӧрӧсдінын мунӧ омӧля. Ыбса ВИК некор оз видзӧдлыв Йӧрӧсдін сиктӧ, крестьяна весиг оз тӧдны, кодлы кутшӧм кокньӧдъяс (льготы) таво вот мынтысьяслы. Волисполкомса юралысьӧс бӧрйӧмсяньыс миян крестьяна эз на аддзывны. Крестьяна оз тӧдны, кутшӧма уджалӧ волисполкомыс, оз тӧдны вӧлӧстнӧй бюджет йылысь, крестьянскӧй выигрышнӧй заём йылысь да уна мукӧдтор йылысь. Колӧ эськӧ Ыбса волисполкомлы бурджыка уджсӧ нуӧдны да ёнджыка висьтавлыны йӧзыслы быдтор йылысь. Мыйла нӧ сійӧ омӧля уджалӧ? Сэтчӧ бӧрйӧм йӧзыс оз вермыны бура уджсӧ нуӧдны. Регыд кутасны выльысь бӧрйысьны Сӧветъясӧ. Крестьяналы колӧ бурджыка та йылысь мӧвпыштны да бӧрйыны Йӧрӧсдінысь сюсьджык, вежӧраджык мортӧс, медым вермас крестьяналы висьтавлыны быдсяма законъяс да мукӧдтор.

Эм Йӧрӧсдінын комсомол ячейка. Крестьяна пӧвстын уджсӧ омӧля жӧ нуӧдӧны. Сійӧн крестьяна абу дӧвӧльӧнӧсь комсомолнас, шуӧны: некутшӧм бур пӧ найӧ миянлы оз вӧчны.

Участкӧвӧй агроном оз волывлы. Крестьяна неуна кутісны нин гӧгӧрвоны, кутшӧм бур бобӧнянь да анькытш кӧдзӧмысь, дай тавоясӧ ӧткымын кӧдзавлісны нин.

Крестьяна эськӧ зэв ёна кӧсйӧны организуйтны видз-му уджалан тӧварищество — да сӧмын тай бурджык руководительыс абу. Сы вӧсна крестьяна оз вермыны бура выль олӧмӧ кутчысьны. Колӧ эськӧ Йӧрӧсдінсалы индыны туй сюсьджык йӧзлы.

Петшӧр.