ПӦДДЕЛЬНӦЙЫН (КУЛӦМДІН УЕЗД)

Исполком уджалӧ бура. Председательыс сюсь, уджсӧ тӧждысьӧ кыпӧдны. Секретарыс (партийнӧй) бура жӧ уджалӧ. Крестьяна исполком вылӧ видзӧдӧны бура.

Лыддьысян керка уджаліс ӧнӧдз пыр на омӧля. Мужикъясыд эськӧ корсюрӧ и волывлӧны да, избачыс омӧля волывлӧ, дыш. Ӧні сійӧс вежӧны. Ме чайта, выль избач кутас бурджыка уджавны.

Волполитпросветын некутшӧм удж на ӧнӧдз эз вӧв. Водзӧ кежлӧ нинӧм жӧ на оз тыдав. Колӧ нин эськӧ садьмӧдчыны да заводитны сэсся уджавны да.

Партия ячейкаын эм гоз-мӧд шлен да гоз-мӧд кандидат. Уджыс ӧні неуна муныштӧ: быд вӧскресенньӧ овлӧ собранньӧ, волывлӧны сэтчӧ бура уна мужикъяс.

Комсомол ячейка гожӧмнас уджаліс: волісны студентъяс да, найӧ бура лӧсьӧдлісны ячейкалысь уджсӧ. Найӧ мунӧм бӧрын ӧні мыйкӧ уджалӧмыс ланьтыштіс жӧ. Секретарыс дышӧдчӧ, зэв шоча волывлӧ ячейкаас. Страда бӧрад ӧні войтырыс эштӧджык нин — колӧ босьтчыны уджавны.

Нывбаба кост некутшӧм удж оз мун ни оз кӧсйы мунны. Эмӧсь делегаткаяс, да партия ни комсомол ячейка оз тӧдны. Тӧвнас колӧ жӧ заводитчывны на костын уджавныс. Таво тӧв лоӧны кык уджалысь нывбаба костын: Королёва Н. А. да Колыхматова А. Колӧ налы босьтчывны прамӧйджыка нывбаба кост удж дінас.

Кооператив лавкаын эм 200 кымын шлен. Служащӧйяс оз бура уджавны. Приказчикыс справляйтӧ быд праздник. Спас праздник дырйи вӧлі лэччӧма Вомынӧ да ас пыддиыс кольӧма мамсӧ; сылӧн, дерт, прамӧй вузасьӧм абу вӧлӧма, кӧлачысь кындзи пӧ нинӧм абу сеталӧма.

Коркӧ ачыс приказчикыд локтӧма вӧскресенньӧ рытас да восьтылӧма лавкатӧ регыдик кежлӧ. Выльлунас бара вузасьтӧм лун. Тадзтӧ, дерт, абу шань.

Счетовод Попов лавкаын век мыйкӧ бызгӧ мый оз шогмы кывзыны, лёк сёрнияс.

Судзӧдӧны лавкаӧ уна журналъяс, сӧмын пӧльзаыс зэв этша: весьшӧрӧ бус пиас туплясьӧны.

Больничаын эм кык пельшӧр, ӧти бабка дай врач. Больнича уджалӧ бура, волывлысь уна. Войтырыс зэв ошкӧны больничаас уджалысьяссӧ. Уна пемыд нывбаба на, дерт, оз гӧгӧрво больничалысь став бурсӧ да оз на локны сэтчӧ кага вайны — вайӧны гидӧ да, кытчӧ да.

Гӧрд мак.