ГӦРД АРМИЯӦ МУНАМӦЙ!
Талун заводитчӧ 1903 вося том йӧзӧс Гӧрд Армияӧ призывайтӧм (босьтӧм). Талунсянь уна сё том коми войтыр кутасны локтавны призывнӧй пунктъяс вылӧ.
Тӧдӧны-ӧ том коми войтырыс, кытчӧ найӧс босьтӧны? Тӧдӧны-ӧ бать-мамъяс, чойяс, вокъяс, кытчӧ найӧ пинысӧ, вокнысӧ лӧсьӧдчисны мӧдӧдны? Дерт, тӧдӧны. Том коми войтыр мунӧны Гӧрд Армияӧ; бать-мамыс найӧс ыстӧны ыджыд удж вӧчны — видзны горш буржуйясысь Сӧвет власьтӧс, видзны уджалысь йӧзӧс, налысь вӧлясӧ, налысь власьтсӧ. Коми йӧз тӧдӧны — Гӧрд Армияын военнӧй уджӧ велӧдчӧм кындзи, тшӧтш том йӧзӧс югдӧдӧны, бур вежӧр сетӧны.
Ми ставным тӧдам — Сӧвет власьт, уджалысь йӧзлӧн власьт, оз вермы овны Гӧрд Армиятӧг. Капиталист государствояс ёна на пиньнысӧ йирӧны миян вылӧ. Налысь уджалысь йӧзлӧн медводдза государство синнысӧ сёйӧ. Быд здук видзӧдчӧны путкыльтны. Сӧмын полӧны миян Гӧрд Армияысь. Тӧдӧны — уськӧдчасны кӧ, Гӧрд Армия налысь ёсь пиньнысӧ чегъялас.
Полӧны-ӧ том йӧз мунны Гӧрд Армияӧ? Бӧрдӧмӧн али кокни сьӧлӧмӧн мунасны? Сьӧд синваӧн-ӧ колльӧдасны найӧс бать-мамныс важ, сардырся армияӧ моз? Ми водзвыв вермам шуны: том йӧз кокни сьӧлӧмӧн мӧдӧдчасны, бать-мамныс налӧн оз кутны кисьтны сьӧд синва. Гӧрд Армияыд ӧд быд боксянь ёна торъялӧ важ армиясьыд. Важ армия видзліс, дорйыліс сӧмын озыр йӧзӧс — Гӧрд Армия дорйӧ сӧмын уджалысь йӧзӧс. Важ армияын салдаттӧ эз лыддьывны мортӧн. Шулывлісны — салдат пӧ да пон ӧткодьӧсь. Гӧрд салдат, гӧрдармееч лыддьыссьӧ гражданинӧн. Сійӧ, став уджалысь йӧз моз жӧ, бӧрйысьӧ сӧветъясӧ, сійӧ вермас бӧрйыссьыны сӧветъясӧ. Важ армияын салдатӧс нинӧмӧ эз велӧдлыны, винтовка кутӧм кындзи. Гӧрд Армияын велӧдӧны грамотаӧ, велӧдӧны политика уджӧ, велӧдӧны овны дай уджавны бур ногӧн.
Унаысь гӧрдармеечьяс асьныс гижлісны миян газетӧ: Гӧрд Армияӧ пӧ мӧдӧдчигӧн ми поламкодь вӧлі. Ӧні пӧ зэв радӧсь, Гӧрд Армияӧ веськалім да. Сэні пӧ миянӧс мортӧ пӧртісны. Гӧрдармеечьяс чуксалӧны том йӧзӧс локны армияӧ повтӧм сьӧлӧмӧн.
Том коми войтыр, энӧ вунӧдӧй: Гӧрд Армия — уджалысь йӧзӧс дорйысь армия, — Гӧрд Армия пыр на вӧлі ён, Гӧрд Армияӧс некутшӧм армия на эз вермыв, Гӧрд Армия сайын Сӧвет власьтлӧн ёнлуныс. Энӧ жӧ чинтӧй сылысь ёнлунсӧ, чорыда кутӧй ас кианыд винтовка.
Ми тіян вылӧ надейтчам. Ми тӧдам, ті бура велӧдчанныд Гӧрд Армияын, бура видзанныд уджалысь йӧзлысь власьтсӧ, чорыда доръянныд Сӧвет власьтӧс.
Тадзи тшӧктӧ вӧчны тіянӧс став уджалысь йӧз.
Бур туй тіянлы, Гӧрд Армияӧ мунысь ёртъяс!
