АБЪЯЧОЙЫН (СЫКТЫВ УЕЗД)

Волисполкомын юралысь Ликачёв ёрт удж нуӧдӧ бура. Служитӧ мӧд срок нин да позьӧ на водзӧ бӧрйыны. Секретарыс шлен РЛКСМ Ликачёв ёрт уджалӧ неважӧн на, удж нуӧдӧ шӧркоддьӧма.

Волземкомиссияын юралысь Багин ёрт служитӧ мӧд-коймӧд срок нин. Крестьяна норасьӧны: дыр пӧ оз видлав шыӧдчӧмъяс (заявленньӧяс), тӧлысь кык-куимӧдз пӧ оз сет некутшӧм ӧтвет.

Коммунист ячейкалӧн восьса собранньӧяс оз овлыны. Коркӧ гашкӧ шочиника и овлӧны да, крестьяна оз и тӧдлыны. Тадз абу шань. Крестьяна нинӧм оз тӧдны партия йылысь: мый вӧчӧ, кыдзи уджалӧ, мый кӧсйӧ водзӧ вӧчны.

Комсомол ячейкаын шленыс да кандидатыс нелямын мортысь унджык. Ас костас уджыс омӧля мунӧ. Весиг некутшӧм дисциплина абу. Гожӧмнас красноармееч семьялы да мукӧд гӧль дӧваяслы ытшкыны, куртны да вундыны кымыныськӧ ветлісны жӧ. Мукӧд пӧлӧс удж сэсся некутшӧмӧс йӧз костын оз нуны.

Профсоюз шленъяс коді кыдзи кужӧ — сідзи и олӧ. Ас костас некутшӧм дисциплина абу. Унаӧн весиг собранньӧяс вылас оз волывлыны. Собранньӧяс овлӧны шоча.

Сельхозналог таво 3584 шайт 46 ур. Колян во серти этша 24%-ӧн. Налог вылӧ таво крестьяна видзӧдӧны бурджыка колян во серти. Сӧмын гӧль крестьянаыс тай шуасьӧны: мыйлакӧ бура олысьяслӧн неуна жӧ миянысь ыджыдджык вотыс, овмӧс сертиыс некыдз оз лӧсяв. Тайӧ, ми ногӧн кӧ, со мыйла: гӧль крестьяна гижасигад петкӧдлӧны ставсӧ мый эм (ӧти мӧссьыд ӧд он буракӧ дзеб), а бура олысьясыд нёль-вит мӧссьыд пасйӧдӧны сӧмын кыкӧс да куимӧс. Тадзтӧ чинталӧмнад, дерт, сэсся налӧн налогыд оз кай.

Мукӧдлаӧ, Сибыръясӧ мунӧм. Вӧлӧсьтсьыс ас окотаӧн мунісны Сибырӧ крестьянин комын гӧгӧр. Мукӧдыс став керка-картасӧ, став овмӧссӧ мунігас вузавлӧ. Код тӧдас, тадзтӧ сьӧдад мунӧмнад кытчӧкӧ инасьласны оз. Видз-муыс налӧн кольӧ общество фондӧ. Сӧмын юклӧнысӧ тайӧ фондсӧ омӧля: гӧльлы пыдди унаысь веськавлӧ бура олысьяслы. Сэтшӧм дивӧыс ӧтчыд вӧлі Остапов сиктын.

Турун пуктыны да нянь чукӧртны поводдя таво вӧлі зэв бур. Кӧдзаяс таво шочӧсь.

С. Ш.