СУД МАСЛОВ ЁРТЛЫ

Мыжыс абу эськӧ да, судитӧны

Берлин. Лейпцигса судын коммунист Масловӧс судитӧны нин нёльӧд лун. Судлы некутшӧм мыжданатор Масловӧс эз сюр. Весиг меньшевикъяслӧн «Форверст» газетын гижӧны: некутшӧм мыж пӧ Масловлӧн абу. Судӧдзыс Масловӧс пукӧдӧмаӧсь нин 15 тӧлысь, висьмӧма нин сэні ёна сійӧ. Маслов суд вылын шуӧ: ме пӧ коммунист, пыр пӧ кута сулавны чорыда коммунизм дор. Сійӧ пӧ абу прамӧй морт, коді пӧ тюрмаын пукалӧмысь повзяс да эновтас ассьыс партиясӧ. Мукӧд мыжъяс кындзи ещӧ Масловӧс мыждӧны «государственнӧй изменаысь» «Уроки русской революции» нига серти. Сійӧ нигасӧ Масловыс гижлӧма тюрмаас нин. Маслов шуӧ: ме пӧ став гижӧдсӧ сетавлі видлавны судебнӧй следовательлы. Став гижӧдыс пӧ муніс сійӧ ки пыр. Сэсся мыждысьыс (прокурор) суд вылас вӧлі шуӧ: Масловӧс пӧ ыстісны Германияӧ большевикъяс агент пыдди. Маслов сылы воча шуис: ме пӧ ола Германияын кызь вит во нин да уджала германияса университетъясын. Сэсся Маслов шуӧ: коммунистъяс пӧ висьталӧны сійӧ жӧ, мый гижӧма Маркслӧн (Марксыслысь нигаяссӧ абу запретитӧмаӧсь лыддьыныс да разӧдныс) — вынтӧммӧдны рабочӧйяслы капиталистъясӧс.