ВЫЛЬ ЗАКОН ТУЙЯС ВӦЧӦМ ЙЫЛЫСЬ
Август 17-ӧд лунӧ
Медводдза юкӧдас (пункт 1-й) тайӧ законас шуӧма: 1925−1926 бюджетнӧй восянь местнӧй бюджетӧ колӧ сюйны рӧскод туйяс вӧчӧм вылӧ — обласьтпытшса, уездпытшса, вӧлӧсьт либӧ сиктпытшса.
Во кык-куим сайын ми весиг думыштлыны эгӧ вермылӧ туйяс вӧчӧм вылӧ мыйкӧ мында вичмӧдны вӧлі местнӧй бюджетысь. Унджык губерняыс РСФСР-сьыс оз вӧлі вермыны государствосянь отсавтӧг мынтыны жалӧванньӧ учительяслы, пельшӧръяслы да мукӧдлы — кысь нин эськӧ туйяс вӧчӧм вылӧ сетны.
Ӧні тайӧ выль закон петӧмыс висьталӧ: ми воддза дорысь бура нин олам, овмӧс кыптіс вылӧ нин.
Водзӧ тайӧ законас шуӧма: обласьтувса либӧ губерняувса туйяс вӧчӧм вылӧ лэдзсьӧ государственнӧй вӧр дачаясысь вӧрыс джын донӧн; уездувса, вӧлӧсьтувса да сиктъясувса туйяс вӧчӧм вылӧ вӧрыс сетсьӧ дзик дон босьттӧг — прӧста. Сэсся прӧста жӧ сетсьӧ перйыны галя из либӧ лыа кытысь колӧ.
Сэсся тайӧ законыс шуӧ туйяс вӧчан уджас кыскыны тшӧтш йӧзсӧ. Ӧнӧдз унаысь тадзи вӧвлі: скод вылын шуасны туй вӧчны либӧ туй пос справитны, кымынӧнкӧ мунасны сійӧ удж вылас, мукӧдыс оз мунны. Ӧні лоас со кутшӧм пӧрадок: общӧй собранньӧ вылын шуасны кытыськӧ туй вӧчны. Тайӧ уджас кыскыссьӧ став йӧзыс, вермытӧмъясысь кындзи (инвалидъяс да несовершеннӧлетньӧйяс). Кодъяс вермӧны мездысьны тайӧ уджсьыс, общӧй собранньӧ вермас налы шуны сьӧмӧн мынтысьны сы пыдди (та йылысь пӧрадоксӧ — уна-ӧ сюйны да кыдзи перйыны — лӧсьӧдас центральнӧй власьт). Сійӧ сьӧмыс чукӧртсьӧ сельсӧветӧ, мукӧдтор вылӧ оз позь сійӧс видзны, туйяс вӧчӧм вылӧ кындзи.
Миян Коми обласьтын туйяс ёна омӧльӧсь. Колӧ быдӧнлы сьӧлӧмысь кутчысьны тайӧ выль законсӧ бура нуӧдны. Волисполкомъяслы да сельсӧветъяслы медвойдӧр колӧ кутчысьны тайӧ уджас.
