КОЛӦ ВИДЗ-МУ ЮКЛЫНЫ

Айкатыла вӧлӧсьтын (Емдін уезд) 1902 восянь нин эз вӧв юклысьӧм (вотчина ӧткодялӧм). Гӧль крестьяна ёна нин Октябрса революция лоӧмсянь корӧны юклысьӧм, но ӧнӧдз на век эз вермывны, озырджыкъяс да серӧднӧй крестьяна кыдз-мый вермисны век пыкисны гӧль крестьяналысь кӧсйӧмсӧ, кыдз-мый вермисны старайтчисны дугӧдны юклысьӧм. Колян во заводитлісны нин юклысьны, муяс мерайтлісны нин, но тӧлк нинӧм эз босьт: сӧмын косьӧ да пиньӧ воисны гӧль крестьяна озыръяскӧд. Кодлӧн муясыс вӧлі петӧ, найӧс и бӧрйылісны муртасьысьясас, дерт, найӧ аслыныс лёк оз вӧчны: джын мунысӧ сӧмын ассьыныс мерайтӧмаӧсь, а гӧльыслы ыдждасӧ содтӧмаӧсь. Кватитчисны да, гӧль крестьяналӧн муыс пондіс петны, а озырлӧн уна дорас содны. Гӧльясыд, дерт, сэсся тадзитӧ эз сӧгласитчыны, бара важ мозыс коли.

Таво вылӧ волземкомиссия видлалӧма 75 жалӧба гӧль крестьянасянь, ставыс видз-му йылысь. Дерт, тадзтӧ оз вермы водзӧ мунны видз-му уджалӧм бурмӧдӧмыд. Неважӧн Айкатыласа волисполком шуис Обисполкомлысь корны права мырдӧн юксьӧм вӧчны. Обисполком, дерт, аддзӧ гӧль йӧзлысь тӧждысьӧмсӧ да, ме чайта, тшӧктас юксьыны.

Таво бара на, дерт, озыръяс кутасны пыкны юклысьӧм, мӧдасны гӧль йӧзӧс бертны асланьныс. Юклысьны заводиттӧдз та йылысь ёна колӧ висьтавлыны комсомолечьяслы да партийнӧй йӧзлы войтыр собранньӧяс вылын. Мед колян вося ӧшыбка оз нин ло. Сэсся колӧ йӧзсӧ тӧдмӧдавны видз-му вӧдитӧм йылысь законъясӧн да бӧръя Сӧвет съездъяс шуӧмъясӧн.

А. Лютоев.