ОТЙЫН (ЕМДІН УЕЗД)

Водзӧ кежлӧ нӧшта бура уджавны

Мӧйму ар восьтісны миян видз-му ӧтувйӧн уджалан чукӧр (сельскокӧз. кооп. т-во) «Выль туй». Пырисны кызь шлен. Тӧвнас тӧвариществолы уджавнысӧ кутчысьны некытчӧ вӧлі — лёк, няньтӧм во вӧсна шленъяслӧн олӧмыс вӧлі зэв омӧль.

Тулыснас 900 шайт кымын Комисельбанк сетіс уджӧн — сы вылӧ т-во ньӧбис 12 кӧрт плуг, ӧти пиня (зигзаг). Кӧдзисны нёль пуд анькытш, кӧкъямыс пуд шабді-долгунеч; анькытшыс буркодь лои эськӧ, да ёна му вывсьыс гусявлісны; шабді локтӧ зэв бур — любӧ видзӧднысӧ.

Кӧдзӧма пуд нёль ид, кӧсйӧны кӧдзны пуд сизим сю таво, сӧмын абу на кӧйдысыс. Турун керӧма додь 12; чиститӧма-ректӧма десятина кык выль видз. Ӧні банк сетіс бара сё ветымын шайт — кӧсйӧны ньӧбны бур Емва пороз да бур рӧд кык мӧс.

Мукӧд тӧвариществояс кутшӧма уджаланныд — шыӧдчӧй!

«Тури».