ЛЯЙЫН

(Серегов вӧлӧсьт, Емдін уезд)

Крестьяна норасьӧны гӧль олӧм вылӧ. Лун и вой пӧ лоӧ уджавны, а пӧльза некутшӧм абу. Ещӧ на пӧ ӧд налогӧн тыртӧны. Кӧть мед оз нин налогсӧ корны. Мыйла нӧ татшӧма норасьӧны Ляйсаясыд ас гӧль олӧм вылас? Мый нӧ налы оз тырмы? Сёрниӧ кӧ воан накӧд да юалан, уна-ӧ тіян скӧт, турун, то воча висьталасны: турунсьыд пӧ пӧгибад огӧ воӧй — медэтша 30 доддьӧн, а овлӧ и 60 доддьӧдз керка вылӧ. Скӧт пӧ 2−3−4 и 5 мӧскӧдз эмӧсь видзӧны. Нянь некод оз шу тырмымӧн во гӧгӧр кежлӧ.

Кытысь нӧ эськӧ «бур олӧмыс» Ляйсаяслы? Асьныс шуӧны: тані олӧмысь пӧ пӧльза нинӧм абу, колӧ пӧ заводӧ пышйыны. А ме ногӧн кӧ, абу сідз. Колӧ кутчысьлыны сэні овмӧссӧ пуктыны бурджыка, кыдзи тшӧктӧ нига, а скӧт (мӧсъяс) видзны колӧ бур рӧд (пӧрӧда), мед асьнысӧ вештӧны.

А то шуӧны: 3 мӧс пӧ, а вый босьтны лоӧ.

Комсомол ячейкалы колӧ ёна босьтчыны сійӧ уджас, мед войтырыс аддзас бурсӧ да тшӧтш пондас кутчысьны.

Кыдзи нӧ сійӧ вӧчны? А позьӧ: сы вылӧ эм сельскокӧзяйственнӧй кружок, сэні колӧ уджсӧ пуктыны бурджыка, сы пыр вӧчны медводз ас шленъяс костын, а бӧрнас сэсся и быдӧн кутасны пырны кружокӧ да велӧдчыны уджавны выль ногӧн. Сӧмын колӧ петкӧдлыны.

Ӧнӧдз миян комсомол сӧмын лёктор керис: праздник дырйи тышкасисны, удждысян тӧвариществоӧ уджйӧз оз мынтыны да судӧ веськалӧны (на вылӧ видзӧдӧмӧн и став крестьянаыс вермасны не мынтыны).

Йӧз югдӧдан удж некутшӧм оз нуны.

Колӧ кӧть ӧні тіянлы, Ляйса том йӧз, босьтчыны, ті ӧд выль кӧзяинъяс коркӧ лоанныд, выль ногӧн овмӧс лӧсьӧдысьяс.

Колӧ шыбитны заводӧ да служба вылӧ каръясӧ мунӧм думъяс, а думыштны ас кӧзяйство йывсьыд.

Надейтча, Ляйса босьтчасны!

Луч.