ЛӦЗЫМЫН (СЫКТЫВ УЕЗД)

Сельсӧвет уджалӧ шӧркоддьӧма. Председательыс Симаков ёрт грамотнӧй, быдтор йылысь гӧгӧрвоысь морт, кужӧ крестьяналы сетны быдсяма сӧвет. Сӧмын ӧтитор дзугыштӧ: тшӧкыдкодя юыштлӧ.

Эм кооператив: 180 шлен сэні, на пиын сӧмын квайт нывбаба. Лӧзымын нывбабаяс зэв на омӧля общество уджад кутчысьӧны. Собранньӧяс вылын, скодъяс вылын ньӧтчыд нывбабаӧс он аддзыв. Сы понда миян нывбабаяс зэв на пемыдӧсь, оз на гӧгӧрвоны кооперативлысь да мукӧд учрежденньӧлысь бурлунсӧ да коланлунсӧ. Кооператив судзӧдӧ кык номер «Югыд туй» газет: ӧти номерсӧ сетӧ крестьяналы, мӧдсӧ аслыс кольӧдӧ. Мукӧд пӧлӧс йӧзӧс югдӧдан удж оз жӧ сэсся некутшӧмӧс нуӧд.

Восьтісны асшӧр кӧйдыс запас (семеннӧй фонд). Скод вылын шуисны чукӧртны быд едокысь кык пунтӧн нянь (ӧти пунт ид да ӧти пунт сю). Крестьяна сэсь аддзӧны зэв ыджыд бур: вайӧм кӧйдысыд пӧ татчӧс муад оз бура быдмы. Кӧйдыссӧ шуисны чукӧртны саломщик амбарӧ. Чукӧртны, видзны да сетавны шуисны индыны комсомолечьясӧс.

Лӧсьӧдӧны уна пӧлӧс переменаӧн му уджалӧм. Таво ӧтлаалісны му йӧръяс, сэсь бара аддзисны зэв ыджыд бур: ӧти-кӧ, став потшӧссӧ юклісны да выльысь потшисны, мӧд-кӧ — зэв ёна чині потшӧсыс, коймӧд-кӧ — кодлы мый колӧ позяс кӧдзны коськӧм вылӧ: турун, картупель, анькытш да мукӧдтор. Таво коськӧм вывсьыд анькытшъястӧ босьталісны зэв бурӧс. Сэсся кӧдзисны сюӧн — ӧзимъяс зэв бурӧсь.

Заводъясӧ пес керавны таво мунӧ морт 62 гӧгӧр. Мунӧны том йӧзджык.

Лэдзӧны стенӧ ӧшӧдан газет комсомолечьяс. Крестьяналы стенгазет зэв сьӧлӧм вылас воӧ. Гижӧма комиӧн: крестьяна да том йӧз зэв ёна лыддьӧны.

Эм мӧда-мӧдлы отсасян комитет: сэні шлен 79 гӧгӧр, уджалӧ бура. Удж нуӧдысь Конанов ёрт старайтчӧ нинӧм дон босьттӧг зэв ёна. Крестьяна комитет вылӧ видзӧдӧны бура.

Пельшӧр абу: кӧнкӧ Паджгаын 7 верст сайын эм да, оз и тӧдны. Кодсюрӧ ветлывлӧмаӧсь жӧ, да ньӧтчыд гортсьыс абу сулывлӧмаӧсь.

Селькор.