НЁБДІНЫН (КУЛӦМДІН УЕЗД)

Войтыр видз-му дорын уджалӧ, но сійӧ асьсӧ оз вешты. Лоӧ ёна ветлывлыны уджавны заводъясӧ. Гортын лэдзӧны сортовка вӧр, вӧчӧны шпал да вӧралӧны. Ас нянь оз тырмы — олӧны ньӧбӧмӧн. Нажӧтка кӧ абу, омӧль овны. Таво кежлӧ войтыр виччысьӧны унджык удж сортовка дінын.

Войтырыс бура сёрнитӧны Сӧвет власьт йылысь.

Кыдзи уджалӧны:

волисполкомын удж мунӧ зэв бура. Крестьяна ошкӧны.

Отсасян комитетын удж мунӧ лӧсьыда, но абу средство. Отсасян комитет удж бердӧ гӧль крестьяна да дядьӧяс ёна кутчысьӧны.

Лыддьысян керкаын уджыс оз мун. Избач оз уджав — оз куж, оз вермы уджсӧ сувтӧдны. Мыйлакӧ тай со шогмытӧм избачсӧ ячейка мырдӧн тшӧктӧ служитны. Дядьӧяс шуӧны нин: прӧстӧ пӧ деньга босьтӧ.

Комсомол ячейкаын удж мунӧ.

Коммунист ячейкаын удж оз мун. Секретарыс Шаманов ёрт уджсӧ нинӧм оз нуӧд дай шоча зэв волывлӧ ячейкаас.

Воӧм студентъяс ёна удж крестьяна кост нуӧдӧны. Йӧзыс найӧс ёна ошкӧ, век мунӧны на дінӧ быдпӧлӧс справкаӧн, радейтӧ кывзыны налысь висьтавлӧм. Ёна ыджыд пӧльза вӧчисны таво студентъяс.

Сьӧм удждан тӧвариществоын удж мунӧ.

Кык кооператив лавка бура уна да колан тӧварӧн вузасьӧны.

Милиционерлы удж тырмӧ: норасьӧ — уна пӧ эмӧсь лёк йӧз, уналы пӧ он угодит.

Ячейка «Общество Друзей Воздушного Флота» да ячейка «МОПР»-ын удж оз мун.

Эм челядь видзан ясли, но зэв этша челядь волывлӧны — нинӧм вылӧ пӧ паськӧдчыныс. Ветлӧдлісны эськӧ исполнительнӧй листӧн да, ог тӧд, мыйкӧ чукӧрмыліс эз.

Женотделлы колӧ Кулӧмдінысь корны средство, эм кӧ ӧд, сетасны жӧ.

Ёкыш.