«СЕВЕРОЛЕСЛЫ» ВӦР ЛЭДЗӦМ ЙЫЛЫСЬ
Мый шуисны крестьяна
Проньдор вӧлӧсьтын, Емдін уездын, август 16-ӧд лунӧ вӧлі конференция Всеработземлес союзлӧн. Чукӧрмылісны став деревнясьыс 22 морт. Конференция вылын висьталіс бригадаын уполномоченнӧйыс кольӧм тӧлын удж нуӧдӧм йылысь. Удж йылысь сёрнитӧм бӧрын шуисны: Северолеслы пӧ шпал да кер лэдзӧмыс ёна отсаліс гӧль крестьяналы. Сӧмын колӧ водзӧ кежлӧ неуна донсӧ содтыштны шпал вӧчысьяслы. Конференция ёна чорыда тӧлкуйтіс быд боксянь Зӧвсьӧртса рабочком да Проньдорса юралысь уджалӧм йылысь. Сэсся шуисны: таво колӧ уджсӧ заводитны колян воысь водзджык, октябр тӧлыссянь кымын. Колӧ вайны унджык чер да мукӧд уджалан кӧлуй.
Могилов ёрт (Проньдорса юралысь) да Зӧвсьӧртса рабочком кольӧм уджалігӧн бур дона уджсӧ сортовка вӧчигӧн сетісны кутшӧмсюрӧ йӧзлы, коді весиг абу союзын — тадзи абу бур, водзӧ кежлӧ медым сэтшӧмторъясыс эз вӧвны. Уджалысьяс доймывлӧмаӧсь унаӧн, абу вермӧмаӧсь уджавны вежонӧн, кыкӧн, мукӧдыс тӧлысьӧдз — да некодлы абу мынтысьлӧмаӧсь. Колӧ пельшӧрлы сетны права лэдзны доймӧм уджалысьӧс куим лунысь дырджык кежлӧ да сэсся водзӧ кежлӧ мынтыны доймысьяслы.
Газет судзӧдӧм вылӧ кольӧдӧны вӧлі прӧчент джын (½%) нажӧткаысь, а зэв шоча газетсӧ ыстывлісны — вӧліс сӧмын 4−5 газет. Водзӧ кежлӧ тайӧ уджсӧ колӧ пуктыны бура.
Деньгаыс уджалӧмысь волывлӧма куим тӧлысь мысти уджалӧм бӧрас — тайӧ зэв омӧль мужикыдлы, водзӧ кежлӧ колӧ бурджыка сувтӧдны тайӧ уджсӧ.
Могилов ёрт ёна йӧзӧс быдсяманас пӧръявлӧма да зэв лёкысь, важ фабрикантъяс моз, командуйтлӧма: договорсӧ вӧчигӧн уджалысьясыс неуна шуасьӧмаӧсь асланьныс да, Могилов ёртыд налы шуӧма: кор пӧ кувны кутад — локтанныд уджавнытӧ. Сэсся быдсяма торъя лишнӧй уджалӧмысь некор абу мынтылӧма. Шпал вӧчигӧн абу сетӧма бӧрйыны пуяссӧ — кодӧс ачыс клеймитас, сійӧс и лоӧ вӧчны. Дядьӧяс ёна тадзтӧ ылавлывлісны — вӧчас, а Могилов ёрт ачыс жӧ сісь вӧсна и бракуйтас. Конференция водзӧ кежлӧ шуис тадзи не уджавны.
Медбӧрын конференция шуис Могилов пыдди выль бур мортӧс индыны. Бӧрйисны союзса бюроӧ куим мортӧс да тшӧктісны налы бура уджавны шленъяс костын (шленыс ставыс вӧлӧсьтас 110 морт гӧгӧр).
Таво вӧлӧсьт вылӧ «Северолеслӧн» удж сетіс дзик няньӧн 6190 пуд рудзӧг да 100 пуд зӧр, а ӧстальнӧйыс деньгаӧн.
Зӧтя Илля.
