НЕУНА ЛЕСНӦЙ СТРАЖА ЙЫЛЫСЬ

Ӧні леснӧй стража босьтӧ бур жалӧванньӧ — кызь шайт саяс, сӧмын уджалӧ омӧля. Босьтам пример: Нёбдінса леснӧй стража вӧрӧ ветлӧ зэв шоча. Кор кыті сотчӧ — некор оз тӧдлыны. Таво ёна тылаяс тулыснас соталісны, а налы нинӧм. Миян коми стража асьныс велӧдӧны вӧрсӧ жугӧдныс — сідзтӧ ми век лоам гӧльӧсь: му вӧчны огӧ кутчысьӧ, век тылаӧн кутам овны. Босьтам ещӧ пример: дядьӧ сортовка лэдзас, шуам, кутшӧмкӧ фирмалы и дядьӧыдлысь бергӧдӧны 8% (быд шайтысь 8 ур) государствоӧ пу йывсьыс да увъяссьыс вӧрсӧ весавны, а сортовка лэдзанінъяс весалӧм некор на эз вӧвлы, весиг пу йывсӧ дядьӧыслы оз прӧста сетны вайны, сідзи и сісьтӧны вӧрас. Та вӧсна медъёнасӧ и овлывлӧ пӧжаръясыд (таво тай весалім жӧ кык лунӧн морт вылӧ волисполком тшӧктӧм серти).

Миян став озырлуныс вӧрын. Колӧ леснӧй стражалы ёнджыка уджавны. Обземуправленньӧлы колӧ леснӧй стражаӧс чирыштны да тшӧктыны бурджыка уджавны. Ӧні ыджыд дон вылад уджалысьыд сюрас.

Ёкыш.